Akadémika prefere Governu kapitaliza espíritu FALINTIL
DILI, 19 Agostu 2025 (TATOLI)–Reitór Universidade Nasionál Timor-Lorosa’e (UNTL), João Soares Martins, prefere Governu kapitaliza espíritu FALINTIL nian, ne’ebé luta ba libertasaun nasionál.
Akadémiku ne’e hato’o asuntu ne’e iha ámbitu komemorasaun loron FALINTIL ba dala-50 (20/08/1975-20/08/2025).
“Ita tenke kapitaliza espíritu ne’ebé Maun FALINTIL sira luta hodi hetan liberdade independénsia maibé la simu saláriu. Entaun ita agora ukun-an ona mak ita-nia FALINTIL-Forsa Defeza Timor-Leste (F-FDTL) lori nasaun ne’e ba di’ak liután,” Reitór UNTL hato’o iha salaun Ministériu Ensinu Superiór, Siénsia no Kultura (MESSK), Kolmera, Tersa ne’e.
Nia nota, FALINTIL ida uluk no forsa F-FDTL ida agora la hanesan, tanba Forsa ida uluk la simu saláriu, enkuantu ida agora simu saláriu, nune’e mós prosesu libertasaun nasionál uluk ho agora la hanesan.
“Tanba etapa luta la hanesan. Era uluk luta ba rezisténsia no luta atu liberta nasaun maibé era independénsia ne’e luta ba dezenvolvimentu nasaun nian,” Reitór UNTL akresenta.
Notísia relevante : Falur konsidera FALINTIL nu’udár identidade Timor-Leste
Reitór dehan, Forsa Armada iha nia papél mak atu kontribui ba dezenvolvimentu nasionál no asegura nasaun ne’e seguru nune’e labele iha instablidade, labele mete polítika no tenke imparsiál atu nune’e defende interrese nasaun no guarda metin soberania Timor-Leste ne’ebé importante liu.
“Tanba ne’e, Governu presiza investe iha Forsa Defeza Timor-Leste atu sai profesionál iha nia serbisu no sai lutu ba nasaun Repúblika Demokrátika Timor-Leste,” nia katak.
Nune’e, nu’udar povu Timor-Leste, nia parte sente orgullu no parabeniza FALINTIL ba loron istóriku 20 Agostu, ne’ebé hanesan loron determinante tebes no loron ne’ebé nia rezultadu ohin loron Timor-Leste hetan liberdade independénsia.
“Kontinua hato’o onra ba sakrifísiu ne’ebé sira iha momentu ne’ebá. Nune’e ba joven F-FDTL sai kontinuadór tenke serví povu no nasaun ida ne’e ba di’ak liután,” nia tenik.
Jornalista : Osória Marques
Editora : Julia Chatarina
