Falur konsidera FALINTIL nu’udár identidade Timor-Leste
DILI, 18 Agostu 2025 (TATOLI)–Xefe Estadu Maiór FALINTIL-FDTL, Tenente Jenerál Falur Rate Laek konsidera Forsa Armada Libertasaun Nasionál Timor-Leste (FALINTIL-sigla portugeza) nu’udár identidade nasaun Timor-Leste.
Jenerál fitun tolu ne’e esplika kriasaun organizasaun forsa gerileira ne’e iha tinan-50 ba kotuk tanba hakarak proteje povu, apoia ba luta independénsia hodi reziste hasoru forsa esterna hanesan luta ba Timor-Leste nia auto-determinasaun liuhosi FRETILIN ne’ebé sai nu’udár forsa polítika tanba hasoru presaun no konflitu iha tempu koloniál.
“Ita afirma identidade la’ós monumentu imovel, maibé prosesu moris ida, karater nasionál hetan forma liuhusi terus no susar. Tan ne’e, reflete loron FALINTIL liuhusi responsabilidade loro loron nian hanesan serbí, eduka, prodús no tau-matan,” hakarek nota deskursu Xefe Estadu Maiór F-FDTL iha ámbitu selebrasaun loron FALINTIL ba dala-50 ne’ebé hala’o iha Munisípiu Baukau ne’ebé TATOLI asesu, Segunda ne’e.
Notísia relevante: Governu aprova projetu rezolusaun ba komemorasaun aniversáriu FALINTIL da-50
Eis gerileiru ne’e relata selebrasaun loron FALINTIL ba dala-50 ne’ebé kada tinan selebra iha loron-20 Agostu la’ós de’it atu halibur malu hodi reflete ba pasadu, maibé sai momentu oportunu atu hafoun valór sira-ne’ebé prezente no trasa lala’ok ba futuru nian.
Falur argumenta ezisténsia FALINTIL nu’udár espresaun ida husi imperativu étiku hanesan atu garante ba povu Timor nia direitu ba auto-determinasaun ho dignidade liuliu iha tempu difísil ne’ebé sai ona ba prinsípiu sira hanesan formasaun no konsolidasaun ba identidade nasionál.
Prinsipiu ne’e, tuir nia, reziste atu lori destinu rasik, disiplina no espíritu sakrifísiu no koletivu nu’udár dalan ba presisténsia dignidade umana, sai nu’udár valór absolutu unidade iha diversidade, nu’udár forsa koezaun no sai ponte entre istória ho nasaun sira seluk.
“Loron ohin apela ba memória gratidaun no ba responsabilidade sira-ne’ebé luta no lakon iha funu laran, gratidaun ba sira-ne’ebé reziste no responsabilidade ba jerasaun sira-ne’ebé sei simu eransa ba nasaun ne’ebé ita harii ohin loron,” Tenete Jenerál Falur subliña.
Falur salienta FALINTIL hanorin sidadaun Timor harii soberania ho responsabilidade, katak defende territóriu no independénsia, respeita direitu internasionál, haburas relasaun ho país viziñu no la rende ba violénsia oinoin.
Entretantu, selebrasaun loron FALINTIL ba dala-50 ne’ebé realiza iha Munisípiu Baukau hala’o liuhosi atividade sira hanesan feira, animasaun palku múzika no misa hamutuk ne’ebé realiza iha loron Domingu, 17 Agostu no ohin kontinua ho marsa ba dame husi Suku Bukoli no enserra ho seremónia ne’ebé realiza iha resintu Administrasaun Munisipál Baukau.
Jornalista: Natalino Belo
Editór: Xisto Freitas da Piedade
