DILI, 30 Jullu 2025 (TATOLI)—Governu liuhusi reuniaun Konsellu Ministru aprova ona projetu rezolusaun kona-ba komemorasaun aniversáriu Forsa Armada Libertasaun Nasionál Timor-Leste (FALINTIL) ba da-50, ne’ebé sei selebra iha 20 Agostu 2025 no sei fó toleránsia pontu ba munisípiu sira-ne’ebé atu halo selebrasaun ne’e.
Notísia Relevante: Komemorasaun loron FALINTIL atu dignifika eroi fó vida ba luta libertasaun
“Ita-boot sira hatene ne’e FALINTIL selebra tinan-50, tanba nia mosu iha tinan 1975 depois ninia prosesu metamorfosa istória la’o to’o ohin loron. Tanba ne’e mak Konsellu Ministru fó importánsia tebe-tebes no aprova ona projetu rezolusaun ba komerasaun loron FALINTIL ninian ne’ebé sei selebra iha munisípiu sira hotu,” Ministru Prezidénsia Konsellu Ministru, Agio Pereira, relata ba jornalista sira iha Palásiu Governu, ohin.
Bazeia ba informasaun ne’e fó sai iha portál Governu katak, tuir rezolusaun ne’e, komemorasaun sei hala’o iha territóriu nasionál hotu, inklui serimónia no atividade sira iha munisípiu Lautein, Baukau, Vikeke, Manatutu, Manufahi no Likisá iha loron 18 fulan-Agostu; iha Ainaru, Kovalima, Bobonaru, Ermera, Aileu, Rejiaun Administrativa Espesiál Oekusi-Ambenu no Illa Ataúru iha loron 19 fulan-Agostu; no Dili iha loron 20 fulan-Agostu.
Timor-Leste komemora, ohin, aniversáriu FALINTIL nian ba da-49 ho tema “Selebra loron 20 fulan-Agostu ne’e selebra FALINTIL nia luta, ne’ebé la diferente, maibé ida de’it. Ida-ne’e maka tempu ba reflesaun no mudansa!”
Iha ámbitu komemorasaun ne’e, Prezidente Autoridade Rejiaun Administrativa Espsiál Oé-Cusse Ambeno (RAEOA), Rogério Tiago Lobato, hateten 20 Agostu 1975, nu’udar data importante, tanba momentu ne’e hakotu podér koloniál portugés sira iha Timor-Leste hodi hamoris Forsa Armada ba Libertasaun Nasionál Timor-Leste (FALINTIL), atu halo insurreisaun jerál ba forsa armada sira atu luta ba ukun rasik-aan.
Programa prinsipál iha komemorasaun loron FALINTIL
Programa ne’e inklui hala’o parada militár, desfile populár sira, misa agradesimentu, enkontru hodi halo reflesaun kona-ba pás, seguransa, konvivénsia sosiál ne’ebé saudavel no kestaun jéneru nian, nune’e mós atividade kulturál sira no vizita hodi fó onra ba semitériu ne’ebé hakoi Martir sira Pátria nian.
Iha Aileu, sei iha misa iha Igreja Saun Paulo no Saun Pedro no tuir-mai tau ai-funan besik iha estátua saudozu Nicolau Lobato nian. Iha Díli, komemorasaun prinsipál sira sei hala’o iha Largo Tasi-Tolu no inklui konferénsia internasionál g7+, desfile militár, diskursu ofisiál, kondekorasaun, asinatura protokolu ho Repúblika Populár Xina ba konstrusaun Ospitál Militár Forsas Armadas nian, han-kalan hamutuk, no konsertu muzikál ho partisipasaun husi Luís Represas no artista nasionál no internasionál sira seluk.
Rezolusaun Governu ne’e determina mós katak, aleinde serimónia protokolár no militár, tenke hala’o atividade kulturál no desportiva, inklui teatru, poezia, dansa tradisionál no atuasaun muzikál sira, liuliu envolve joven no estudante sira.
Governu mós fó toleránsia pontu iha munisípiu sira-ne’ebé kobre, liuliu iha loron ne’ebé selebrasaun aniversáriu ba da-50 FALINTIL nian hala’o iha ne’ebá. Determina mós hodi harii komisaun organizadora interministeriál ida, ne’ebé lidera hosi Ministru Defeza no iha koordenasaun ho F-FDTL, iha responsabilidade atu koordena atividade hotu-hotu no asegura envolvimentu hosi membrus Governu iha selebrasaun sira iha munisípiu balun.
20 Agostu mak hakotu podér koloniál no hamoris FALINTIL
Antes ne’e, iha komemorasaun aniversáriu loron FALINTIL ba da-49 (2024) ho tema “Selebra loron 20 fulan-Agostu ne’e selebra FALINTIL nia luta, ne’ebé la diferente, maibé ida de’it. Ida-ne’e maka tempu ba reflesaun no mudansa” ne’e, Prezidente Autoridade Rejiaun Administrativa Espsiál Oé-Cusse Ambeno (RAEOA), Rogério Tiago Lobato, hateten 20 Agostu 1975, nu’udar data importante, tanba momentu ne’e hakotu podér koloniál portugés sira iha Timor-Leste hodi hamoris Forsa Armada ba Libertasaun Nasionál Timor-Leste (FALINTIL).
“20 Agostu ne’e loron FALINTIL nian, mezmu Komité Sentrál FRETILIN halo proklamasaun ba insurreisaun jerál armada loron balun antes ne’e iha Aisirimou-Aileu, iha loron 15 Agostu 1975, maibé 20 Agostu ne’e mak konsidera loron FALINTIL nia moris. Tanba iha 20 Agostu mak ita hadau kuartél forsa portugéza sira iha Dili laran, depois hakotu podér polítiku koloniál iha Timor-Leste hafoin tinan 470 ukun ita,” Rogério Lobato relata iha nia diskursu.
Jornalista : Alexandra da Costa
Editór : Cancio Ximenes
