DILI, 19 Agostu 2025 (TATOLI)–Prezidente Ezekutivu Komisaun Nasionál Juventude Katólika Timor-Leste (CNJCTL), Padre Francisco Indra do Nascimento Tey-Seran, informa, aniversáriu dahuluk vizita Papa Francisco iha Tasi-Tolu sei iha atividade vijília kalan.
“Programa sira-ne’e sei iha vijília hela iha konsertu espirituál hodi foin-sa’e hotu, tanba iha ambiente orasaun nia laran, entaun kalan ita sei iha vijília hamutuk ho sua Eminénsia Kardeál. Atividade seluk laiha maibé ita iha de’it atividade vijília iha kalan,’ Padre Indra hateteN iha Tasi-Tolu, Tersa ne’e.
Aniversáriu vizita Papa Francisco nian nakloke ba públiku hodi partisipa no halo vijília kalan ho peregrinu sira husi dioseze Baukau, Dili no Maliana.
“Programa sira-ne’e hotu mak dahuluk iha loron 09 Setembru, loke ba públiku atu ita foin-sa’e sira iha ne’e mai konsentra iha Tasi-tolu fatin misa nian. Ekipa nia serbisu mak prepara orasaun no haree mós parte liturjia no eukaristia nian,” Prezidente Komisaun, hato’o.
Notísia relevante : Papa Francisco nia mensajen bolu atensaun atu liberta povu husi mukit
Padre Francisco Indra, dehan, dadeer loron 10 Setembru, oras 06:00 sei iha laudes hamutuk ho peregrinu sira, ne’ebé kalan hader reza hamutuk depois kontinua kedas misa hamutuk.
“Ita-nia misa aniversáriu vizita Papa Francisco nian iha oras 07:00, ne’ebé sei prezide hosi Sua Eminénsia Dom Virgílio Kardeál. Misa ne’e loke ba públiku,” nia tenik.
Aleinde ne’e, peregrinu sei halo akampañamentu iha fatin ne’e to’o loron 10 Setembru no kontinua misa depois fila.
Iha aniversáriu vizita Papa Francisco iha Tasi-Tolu nakloke ba ema hotu hodi partisipa misa.
Jornalista : Osória Marques
Editora : Julia Chatarina
