VIKEKE, 13 Maiu 2025 (TATOLI)—Sarani sira iha munisípiu Vikeke, tersas ne’e, realiza misa agradesimentu nivel munisipál ba Papa Francisco nia vizita iha Timor-Leste hodi hanoin hikas mensajen sira-ne’ebé Papa Francisco tatoli hela ba povu no líder Timor-Leste.
Notísia Relevante: Papa Francisco: Kuidadu ho lafaek sira-ne’ebé hakarak muda imi-nia kultura
Padre selebrante misa agradesimentu ba Papa Francisco, Pe. Abel Soares Alves, hateten mensajen ne’ebé Papa Francisco tatoli hela ba povu no ukun-na’in sira ne’e, sai hanesan bukae no lisaun ida hodi bolu atensaun iha prosesu konstrusaun nasaun ba oin no liberta povu husi mukit.
“Ho domin tomak ne’ebé papa Francisco hatudu ona ba ita, ho laran no neon tomak ba ita, nune’e ita espresa liuhusi eukarístia hamutuk família boot iha munisípiu Vikeke. Mensajen Papa Francisco nian sira-ne’ebé rai hela ba ita, ida-ne’e sai bukae no lisaun ida ba ita, no bolu atensaun ba ita iha prosesu konstrusaun nasaun ne’e ba oin, hodi to’o objetivu liberta povu nian,” Pe. Abel Soares Alves hateten iha ninia omilia bainhira prezide misa agradesementu Papa Francisco nivel munisípiu Vikeke, iha Igreja Imaculda da Conceição, Vikeke Vila, ohin.
Papa Francisco nia mensajen hanesan naroman ida-ne’ebé husik hela ba povu Timor-Leste no bukae ida-ne’ebé tenke kaer metin, atu to’o iha tempu difisil bele uza sai hanesan forsa ba luta libertasaun povu nian.
“Ida-ne’e importante tebe-tebes tanba mensajen Papa Francisco nian bolu atensaun ba ita, kona-ba ameasa no perigu sira iha prosesu dezenvolvimentu nian ne’ebé falun-aan, iha buat di’ak sira-ne’ebé dala barak ita lahatene. Tanba, falun buat di’ak de’it maibé iha laran susar ita deteta hetan. Dalabarak matenek-na’in sira dehan tasi kle’an oinsá ita bele sukat, maibé kle’an ida iha ema-nia laran, ema ida lahatene,” nia dehan.
Notísia Relevante: Papa Francisco: Foinsa’e sira tenke halo barullu no respeita ferik-katuas sira
Mensajen Papa Francisco nian iha tempu liberdade demókrasia la to’o tinan mosu kedas ona ameasa fiar nian, tanba ne’e husu joven sira aproveita luta hodi sai autór ba dezenvolvimentu rai ida-ne’e mak liuhusi asaun estuda no estuda.
“Ita-nia rai rekursu naturál ponténsia tebe-tebes maibé atu dezenvolve rekursu umanu laiha. Ita fó-aan ba eskola hodi kontinu harii rai ida-ne’e hetan pás, iha domin, iha ksolok nia laran sai importante ba foinsa’e sira. Joven sira tenke respeita ita-nia na’in-ulun sira, respeita inan-aman sira no joven sira nafatin dekor ukun fuan sanulu ne’e,” nia hateten.
Prezidente Autoridade Munisípiu (PAM) Vikeke, Francisco C.S de G. Soares, hateten Sua Santidade Papa Francisco fila ikas ona ba Aman Maromak nia kadunan, maibé nia husik hela mensajen ba timoroan sira durante ninia vizita mai Timor-Leste.
“Mensajen ne’e liuliu ba ita sarani katóliku sira liuliu ba alin sira, mensajen ne’ebé ha’u sita hela katak papa husu ita atu kontinua hadomi ita-nia inan-aman. Mensajen Papa nian ida seluk mak husu ita respeita ferik-katuas sira tanba sira mak memória rai ida-ne’e nian,” nia dehan.
Papa Francisco nia mensajen Lafaek ne’ebé mak iha Timor-Leste ne’e, lafaek nia signifika katak perigu ida bele ameasa ba relijiaun.
“Ita deklara katak ita-nia fiar mak kultura. Tanba ne’e, ha’u nu’udár autoridade munisípiu Vikeke fó hanoin ba alin sira no ba inan-aman sira kuidadu ita-nia oan sira, kuidadu mós lafaek sira-ne’ebé mak besi-besik hela iha ita-nia sorin to’o tempu bele destroi ita-nia jerasaun. Lafaek sai hanesan ameasa ida la’ós ba ema de’it maibé mós bele liuhusi teknólojia sira-ne’ebé ita-nia oan sira kaer (telemóvel) ne’e bele ameasa no bele tolan tomak ita-nia kultura. Mensajen hirak ne’e, ita-nia Papa Francisco nian no ita labele imterpreta ba liafuan balada, maibé mensajen ne’e perigu ida-ne’ebé fó ameasa ba ita-nia oan sira iha future,” nia hateten.
Iha misa agradementu nivél munisípiu Vikeke ne’e ramata, autoridade munisipál no lokál,autoridade seguransa (PNTL), sarani sira husi postu administrativu lima kontinua ho atividade kari ai-funan no sunu lilin ba Papa Francisco iha krús boot, resintu igreja Imaculada da Conceção Vikeke Vila.
Notísia Relevante: Papa Francisco: Timor-Leste nia furak mak povu, haree no hadomi imi-nia povu ba!
Jornalista : Vitorino Lopes da Costa
Editór : Cancio Ximenes
