Autoridade Ossú koordena ona empreza konstrui irrigasaun Logobere
VIKEKE, 19 Agostu 2025 (TATOLI)—Administradór Postu Administrativu Ossú, Munisípiu Vikeke, José da Silva Amaral ‘Radekiu’ informa autoridade Ossú komunika ona empreza responsavel ba obra konstrusaun irrigasaun Logobere iha fulan-Agostu ne’e.
“Kona-ba obra irrigasaun Logobere ha’u ba identifika entre autoridade lokál, komunidade no empreza responsavel, sira konkorda malu ona maibé klima (udan) ne’e mak empreza seidauk konstrui obra referida. Sira sei hala’o fali servisu iha fulan ida-ne’e nia laran,” José da Silva Amaral hateten ba TATOLI iha Postu Ossú, Tersa ne’e.
Notísia relevante: Konstrusaun irrigasaun Logobere Ossú de Cima paradu
Autoridade Postu Ossú ne’e haktuir, aleinde hasoru difikuldade ba klima, empreza hasoru mós difikuldade ba eletrisidade tanba empreza presiza eletrisidade kapasidade boot hanesan tripa hodi uza silu besi.
“Maibé tripas ne’e laiha, entaun agora daudaun ne’e besi sira-ne’e silu iha Dili, depois besi sira-ne’e silu hotu mak foin lori fali mai iha fatin konstrusaun. Empreza fó hatene ha’u iha semana ida-ne’e hatama ona besi ba fatin kontrusaun irrigasaun Logobere,” Radekiu informa.
Jornalista: Vitorino Lopez da Costa
Editór: Xisto Freitas da Piedade
