DILI, 19 Agostu 2025 (TATOLI)-Embaixadora Xina iha Timor-Leste (TL), Wang Wengli, relata progresu kooperasaun entre nasaun rua ba Prezidente Repúblika, José Ramos-Horta iha Palásiu Prezidensiál Bairru Pite, tersa-ne’e.
“Ha’u apresia enkontru ho Prezidente Repúblika, relata progresu kooperasaun ne’ebé asina ona, daudaun iha progresu, ita-bele haree Timor-Leste ho Xina loke ona konetividade voo aérea”, Embaxadora hateten ba jornalista sira hafoin sorumutu.
Wang Wenli dehan tinan kotuk Xefe Estadu Timor-Leste vizita Xina, hasoru omólogu Xi Jinping hodi haforsa relasaun bilateral, no asina akordu kooperasaun iha área oioin hanesan serbisu aero ho seluk tan.
Diplomata Xineza ne’e relata mós progresu kooperasaun iha área infraestrutura, turizmu ne’ebé la’o hela. Seluk mak bolsu estudu ba timoroan iha área oioin hanesan agrikultura, saúde no lei.
Relembra fali, iha loron 30 fulan-Jullu tinan 2024, Xefe Estadu, José Ramos-Horta ho Prezidente Republika Populár Xina, Xi Jinping, sai sasin ba asinatura akordu kooperasaun entre Governu Timor-Leste ho Xina ne’ebé reprezenta husi Ministru Negósiu Estranjeiru no Kooperasaun (MNEK), Bendito Freitas, ho Komisaun Reforsa Dezenvolvimentu Nasionál Xína, Zhen Shanjie, kona-ba “Belt and Road Indicative”.
Akordu ne’e importante tebes atu garante serbisu parseria ho Xina kona-ba konetividade, dezenvolvimentu infraestrutura no seluk tan. Belt and Road Indicative daudaun ne’e sai ona programa mundiál ne’ebé liga ba konetividade globál, dezenvolvimentu infraestrutura no telekomunikasaun nian.
Governu liuhusi MNEK, Bendito Freitas, asina akordu rua seluk ho Ajénsia Dezenvolvimentu Kooperasaun Internasionál Xina, Lou Zhaohui kona-ba kooperasaun téknika ekonómika no mós ho administrasaun aviasaun sívil Xína ba akordu serbisu aero entre Nasaun rua.
Akordu importante seluk ne’ebé Timor-Leste ho Xína asina mós mak iha área sira hanesan, promove implementasaun husi inisiativa dezenvolvimentu global, no promove projetu infraestrutura kooperasaun xineza nian, akordu kooperasaun ho Ministru Agrikultura no asuntu Rurál Xina, HanJun, kona-ba konsolidasaun no kooperasaun agríkola entre nasaun rua.
Asinatura ba akordu sira-ne’e iha ámbitu vizita Estadu husi Prezidente Repúblika, José Ramos-Horta, nian ba Xina hodi haforsa relasaun diplomátika entre rai-rua.
Notísia relevante: Governu Xina aprova ona konstrusaun ospitál militár andár ualu
Jornalista : Nelson de Sousa
Editora : Rita Almeida
