AINARU, 19 Agostu 2025 (TATOLI)-Xefe Estadu Maiór Jenerál Forsa Armada (XEMGFA), Tenente Jenerál Domingos Raul Falur Rate Laek, konvida ema hotu atu habelar dame ba mundu hodi hametin prinsípiu ukun rasik-án husi luta na’in sira.
“Tinan-50 neʼebé ita selebra ohin, mai ita fó omenajen ba sira ne’ebé fó sira-nia moris no ba sira ne’ebé kontinua fó sira-nia di’ak, korajen ho étika, dixiplina kontinua forma timoroan”, hatete Falur iha nia diskursu ne’ebé lee sai husi Koronél Renilde Corte-Real, iha ámbitu komemorasaun loron FALINTIL 20 Agostu ba da-50 ne’ebé halo iha munisípiu Ainaru, tersa-ne’e.
Nia hatutan: “Autór sira ita-nia istória ita hotu hakruuk no fó rekoñesimentu klean ba sira nia aten-barani ba rai-lulik ida-ne’e”.
Falur husu ba família husi eroi no eroina sira ne’ebé monu iha funu laran husi Frente Armada, Frente Klandestina, Frente Diplomátika, dadur iha funu laran, juventude loriku ass-uain, Igreja Katólika, hotu-hotu nia aten-barani no sakrifisiu sai nafatin fundasaun ba ita-nia liberdade.
Ulun boot F-FDTL ne’e husu ba organizasaun sira ne’ebé akompaña no apoia luta ba harii Estadu, inklui instituisaun polítika, militár, sivil, umanitária, no internasionál sira ne’ebé kontribui ba pás, justisa, no moris di’ak ita-nia povu nian, ba hotu-hotu, ita-nia agradesimentu kle’an no ita-nia kompromisu atu kontinua harii Timor-Leste ida ne’ebé justu, prósperu, no estável.
“Hein katak memória husi tinan-50 ikus ne’e inspira ita no hein katak tinan 50 tuir mai orienta ita hotu tuir prinsípiu no valór FALINTIL nian hodi enfrenta dezafiu sira ohin loron nian”, afirma eis FALINTIL.
Nia dehan, FALINTIL tenke sai ezemplu ba servisu, unidade ho inkluzaun karakter. “Ita hotu habelar dame ba mundu ho serenidade husi sira ne’ebé hatene sofrimentu husi funu nian no responsabilidade husi sira ne’ebé hili dalan ba justisa nian”.
Falur hato’o agradesimentu ba veteran sira tanba hatudu brani no korajen hodi luta okupasaun no ukun-án veteranu kontinua hatudu apoia iha dezenvolvimentu nasionál, liuliu tranzisaun FALINTIL ba F-FDTL.
“Nu’udar ita selebra meiu sékulu istória nian, agradesimentu ne’ebé klean ba ita-boot sira-nia aten-barani, sakrifisiu, no kontribuisaun sira ne’ebé forma tranzisaun husi FALINTIL ba Forsa Defeza Timor-Leste”, katak tan.
Jenerál Falur konvida ema hotu no instituisaun idak-idak atu halo kompromisiu promove lia-loos no hakribii korrupsaun. “Promove lia-loos no respeitu iha diskursu públiku atu rejeita korrupsaun no abuzu poder, tau matan ba sira ne’ebé vulneravel liu no kuida iha moris loroloron nian, kultura enkontru no perdaun nian. Ho maneira ida-ne’e hakat ba hakat, mak hametin identidade nasionál no dame sai konkretu”.
Falur lori FALINTIL-FDTL nia naran reafirma F-FDTL mak guardiaun, ohin no ba nafatin, ba ita-nia soberania, servidór ba lei, no portadór dame nian.
“Ita hotu hamutuk hodi fó agradesimentu ba Nasaun tomak, ba ita-nia unidade haleu ita-nia istória komun, ba firmeza iha defeza ita-nia soberania, no ba ita-nia fiar iha Timor-Leste nia futuru”, nia konklui.
Notísia relevante: Tinan 50 reflete loron FALINTIL, estudante tenke sai kontinuadór
Jornalista : Natalino Costa
Editora : Rita Almeida
