Partisipasaun povu Bobonaru iha serimónia loron FALINTIL ba dala-50 la másima
BOBONARU, 19 Agostu 2025 (TATOLI)—Partisipasaun povu iha komemorasaun aniversária loron Forsa Armada Libertasaun Nasionál Timor-Leste (FALINTIL) ba dala-50 (20-Agostu 1975-20 Agostu 2025) iha Munisípiu Bobonaru la másima.
Komandante Mar e Guerra F-FDTL, Koronél Adão Brito ‘Jaky’ sente triste tanba komemorasaun ne’e hanesan ba de’it elementu ki’ik-oan ida ka rua no ba ema elite sira de’it.
“Uluk iha Odelgomo ho Ermera ita halo komemorasaun primeiravéz iha situasaun funu nia laran, maibé partisipasaun povu nian ne’e másimu tanba nia sente katak nia pertensida. Depoizde ita ukun-an, ita nia hahalok mudansa. Povu nia preokupasaun oin seluk ona. Tanba ne’e, presiza líder hotu-hotu esforsu, fanun-nafatin, sensibiliza nafatin memoria ida-ne’e para ema hotu bele sente,” nia informa ba jornalista sira iha kampu Futeból Maliana, Tersa ne’e, hafoin reprezenta Xefe Estadu Maiór F-FDTL partisipa serimónia komemorasaun aniversária Fundasaun FALINTÍL ba dala-50.
Maski nune’e, Kombatente Munisípiu Bobonaru, Adriano João ‘Bere-Mali’ orgulu tanba bele hetan konvite partisipa iha serimónia importante ne’e, maibé nia preokupa tanba selebrasaun loron importante ne’e partisipasaun maioria husi autoridade postu ho xefe sira de’it.
“Tuir loloos ohin ne’e loron sira-nian, FALINTIL moris tanba sira (povu),” Eis Primeiru Vise Sekretáriu Zona Kailaku no Asistente Polítika hateten.
Notísia relevante: Bobonaru forma KO komemora tinan 50 loron FALINTIL
Nia dehan nia la fó sala povu, tanba dalaruma la rona informasaun husi Autoridade Postu no xefe sira atu partisipa iha selebrasaun loron istóriku ne’e.
“Bá-oin partisipasaun ita-nia komunidade atu másima, informasaun ne’e tenke to’o iha baze, to’o iha sira kraik, tanba funu ida-ne’e la’ós ema ida ka rua mesak mak halo maibé luta koletiva ida,” nia tenik.
Kona-ba asuntu partisipasaun menus, Primeiru Vise Komisaun Organizadora Komemorasaun Aniversária FALINTIL ba dala-50 iha Munisípiu Bobonaru, Júlio Carvalho Caeiro rekoñese mosu fallansu tanba povu maioria la partisipa.
“Antes ne’e ami konvoka enkontru informa para atu organiza komunidade partisipa hotu, más realidade la akontese tanba iha parte ida ami Bobonaru ne’e konvida komunidade kuandu partisipa iha eventu sira hanesan ne’e, sira mai só bandeira iha liman ne’e kampu nakonu, maibé bandeira laiha, ita konvida mós sira la mai. Ami rekoñese sira la partisipa maibé bá-oin ami sei hadi’a iha eventu sira tuirmai,” nia haktuir.
Partisipa iha komemorasaun ne’e mak Autoridade Munisipál Bobonaru, Autoridade Sivíl ho Militár, Eis Kombatente Frente Armada no Klandestina, Prizioneiru Politiku sira no populasaun balun.
Komemorasaun loron istóriku ho tema “Estender a Paz ao mundo” ne’ebé hala’o iha Munisípiu Bobonaru ne’e realiza mós atividade sira seluk hanesan espozisaun fotografia, kulinária ba ai-han lokál ne’ebé FALINTIL sira konsume iha períodu rezisténsia, joguamizade entre F-FDTL hamutuk ho PNTL kontra funsionáriu Autoridade Munisipál Bobonaru.
Molok ne’e, 18 Agostu, realiza mós atividade kompetisaun Korál no Lee Poezia, apoia umanitária, asisténsia saúde ba komunidade, karavana no atividade seluk tan.
Jornalista: Sergio da Cruz
Editór: Xisto Freitas da Piedade
