BOBONARU, 25 Jullu 2025 (TATOLI)—Autoridade Munisipál Bobonaru (AMB), Sesta ne’e, hamutuk ho FALINTIL-Forsa Defeza Timor-Leste realiza enkontru ho Konsellu Kombatente Libertasaun Nasionál, Polísia Nasionál Timor-leste no Diretór Servisu Munisipál no Delegasaun Territoriál sira hodi forma Komisaun Organizadora (KO) ba selebrasaun tinan 50 loron FALINTIL (20 Agostu 1975-20 Agustu 2025) ne’ebe sei realiza iha Kampu Futeból Maliana, 20 Agustu.
Sekretáriu Autoridade Munisipál Bobonaru ba Asuntu Administrasaun no Finansa, Domingos da Costa husu ba Komisaun Organizadora halo koordenasaun servisu ho komandu F-FDTL hodi fó susesu ba eventu importante ne’e.
“Serimónia ida-ne’e atu susesu ka la susesu filafali ba Bobonaru-oan sira. Entaun, ita tenke fó kbaas hodi simu responsablidade ida-ne’e. Ba ita, id-ne’e la’ós buat foun ida tanba iha tinan hirak liubá ita realiza ona serimónia nivel nasionál iha Odelgomo,” nia hateten iha intervensaun ba atividade ne’ebé realiza iha Salaun Maria-Tapó, Bobonaru.
Iha fatin hanesan, Sekretáriu Autoridade Munisipál Bobonaru Asuntu Sosiál no Organizasaun Komunitária, Júlio Carvallho Caeiro informa katak komemorasaun ne’e sei hala’o atividade oinoin hanesan dansa trandisionál, tebe-tebe no dahur, karavana artístika Forças Armadas da Libertação Nacional de Timor-Leste (FALINTIL), konsertu múzika, espozisaun fotografia rezisténsia, livru rezisténsia, produtu lokál ho artezenatu no kulinária ba ai-han ne’ebé FALINTIL sira konsume iha períodu rezisténsia ho atividade medisina tradisionál.
Aleinde ne’e, nia tenik, sei konstrui uma ba abitante husi forsa Enjiñaria F-FDTL, distribuisaun alimentár ba orfanatu sira, misa agradesimentu, vizita Jardín Eroi no reflesaun ho tema “Estender a Paz Timorense ao Mundo”.
Vise-Prezidente Komisaun Organizadora ne’e informa katak atividade hirak-ne’e sei realiza hahú husi 14-15 Agustu ho serimónia parada.
Komemorasaun ne’e aleinde realiza iha Munisípiu Bobonaru, sei realiza mós iha Munisípiu Aileu, Ainaru, Baukau no Lautein.
Jornalista: Sergio da Cruz
Editór: Xisto Freitas da Piedade
