DILI, 19 Agostu 2025 (TATOLI)-Prezidente Repúblika (PR), José Ramos-Horta, simu karta kredensiál husi Embaixadór Estraordináriu no Plenipotensiáriu foun husi Repúblika Federativa Brazíl mai Timor-Leste, Ricardo Lustosa Leal, iha Palásiu Prezidensiál, Bairru Pite, tersa-ne’e.
PR Horta, hateten Timor-Leste valoriza nia amizade ho Brazíl ne’ebé dura ona ba tempu naruk.
“Parseria ida ne’ebé bazeia iha solidariedade no aspirasaun komun. Ita hein atu hametin liutan ita-nia kooperasaun iha área sira interese komún nian, hodi promove dezenvolvimentu sustentável no ligasaun entre povu ho povu”, Xefe Estadu hato’o.
Ramos Horta, hatudu ninia konfiansa katak ho lideransa Embaixadór Leal nian, relasaun bilaterál sira sei kontinua sai buras, hodi kontribui ba pás no prosperidade iha nasaun rua ne’e.
Eventu ohin hodi reafirma lasu diplomátiku ne’ebé metin entre nasaun rua ne’e.
Embaixadór Ricardo Lustosa Leal maka diplomata kareira distintu ida ho esperiénsia barak iha serbisu estranjeiru Brazíl nian. Durante nia mandatu, nia serbi iha misaun diplomátika xave sira, inklui Ramallah, Vátikanu, Kabu Verde, no Londres.
Nia kontribui ona ba publikasaun akadémiku sira, no hetan ona promosaun dalabarak iha korpu diplomátiku nia laran tanba nia serbisu meritóriu, subliña ninia dedikasaun hodi avansu parseria globál sira Brazíl nian.
Dezde estabelese relasaun diplomátika iha 20 Maiu 2002, Timor-Leste no Brazíl aprofunda ona kolaborasaun iha área edukasaun, defeza, administrasaun públika, saúde no agrikultura.
Brazíl hala’o ona knaar sentrál hodi fó apoiu ba Timor-Leste nia setór justisa, formasaun profisionál, no ensinu superiór, inklui estabelesimentu programa mestradu iha Universidade Nasionál Timor-Leste (UNTL). Estudante timoroan liu 130 no bolseiru relijiozu mós hetan benefísiu hosi interkámbiu akadémiku iha Brazíl , ne’ebé refleta kompromisu ba kooperasaun Sul-Sul no dezenvolvimentu mútua.
Entretantu, Ministru Negósiu Estranjeiru no Kooperasaun (MNEK), Bendito Freitas, akompaña Embaxadór foun Brazíl ne’e hodi entrega karta kredensiál.
Notísia relevante: Ministériu Justisa planeia rekruta Defensór Públiku na’in-tolu husi Brazil
Jornalista : Nelson de Sousa
Editora : Rita Almeida
