DILI, 09 jeneiru 2025 (TATOLI) – Ministru Justisa Sergio Hornai, dehan Governu Timor-Leste liuhusi Ministériu Justisa halo ona kontaktu ho Governu Brazil atu kontrata Defensória sira husi ne’eba hodi reforsa servisu setór justisa iha Timor-Leste.
Hornai afirma, Governu Timor-Leste aprova ona rezolusaun ida hodi fo biban ba Ministériu Justisa hodi halo rekrutamentu ba majistradu judisiáriu ne’ebe laos timoroan, atu bele reforsa servisu setór justisa iha Timor-Leste. Tanba Ministériu Justisa liuhosi kooperasaun ho Brazil hanaran Ajénsia Kooperasaun Brazilleira hakarak kontrata uluk Defesoria Públika hosi Brazil atu reforsa servisu sira justisa nian iha Timor-Leste.
¨Defensória Públika, Governu sei halo kooperasaun ho Ajénsia Kooperasaun Brazilleira, atu haruka Defensór Publiku na’in-tolu husi Brazil mai. Servisu sira la’o hela, koordenasaun ami halo daudaun antes tama ba finadu tinan kotuk¨, Sergio Hornai hateten ba jornalista sira iha nia kna’ar fatin Colmera, kinta ne’e.
Governante ne’e dehan, Ministériu Jusitisa halo ona reuniaun Konsellu Jerál iha setór Justisa nian, Sentru Formasaun Jurídika Jurisiária hodi koalia oinsá mak atu halo rekrutamentu ba juiz internasionál sira.
¨Ha’u reuniaun ona ho Prezidente Tribunál Rekursu, Prokuradór Jerál Repúblika, ami koalia ona iha reuniaun Konsellu Jerál Setór Justisa sira, dehan sira sei haree Juiz no Prokuradór internasionál hira mak ita presiza rekruta atu kontribui liután ba ita-nia servisu tribunal sira no mós ba servisu prokuradór¨, nia konklui.
Jornalista: Natalino Costa
Editór : Zezito Silva