DILI, 20 Agostu 2025 (TATOLI)-Governu liuhusi Ministru Defeza Kontra Almirante, Donaciano Costa Gomes Pedro Klamar, ohin formaliza akordu ho Governu Xina ba konstrusaun ospitál militár andar ualu ne’ebé lokaliza iha Kuartél F-FDTL, Fatuhada.
Akordu ne’e asina direta husi Ministru Defeza no Embaixadora Xina iha Timor-Leste (TL), Wang Wenli, iha ámbitu komemorasaun loron FALINTIL 20 Agostu ba da-50 ne’ebé hala’o iha Tasi-Tolu, ne’ebé asiste direta husi Xefe Estadu, José Ramos-Horta.
“Naturalmente sei entrega ba F-FDTL para halo misaun ba ospitál militar nian, atu serbí militaár sira nomos família sira, polísia no família sira, veteranu sira nomos sidadaun hotu-hotu”, dehan nia ba jornalista sira hafoin formaliza akordu.
Ospitál militár ne’ebé mak bolu ospitál amizade Xina no TL, sei prepara no konstrui hosi Governu Xina, depois mak sei entrega ba Governu Timor-Leste. “Sira sei konstrui ospitál ida ho kama 100 ida, signifika katakospital ida iha kategoria media grante ka boot”.
Governante ne’e fundamenta, prosesu konstrusaun sei lori tempu naruk atu dezenvolve, tanba kama-100 sei fahe ba área-hotu-hotu, liu-liu servisu jerál no servisu emerjénsia ne’ebé militár bele presta ba públiku.
“Harii ospitál militár refere sei la duplika ospitál nasionál sira, maibé sei fó tratametu hotu. Serteza absoluta katak, governasaun ida-ne’e sei inagura, iha mandatu Nonu governu nian sei entrega”, nia konklui.
Notísia relevante: Komandu F-FDTL sei haruka militár 20 bá Xina atu eskola kona-ba médiku
Jornalista : Natalino Costa
Editora : Rita Almeida
