DILI, 20 Agostu 2025 (TATOLI)—Reitór Universidade Nasional Timor Lorosa’e (UNTL), João Martins, husu ba Ministéria Públika no Polísia Nasionál Timor-Leste (PNTL) atu devolve hikas ekipamentu komputadór ne’ebé mak sira apreende bainhira halo intervensaun buska ba Reitór inklui estrutura balun iha UNTL.
Notísia Relevante: Reitór UNTL simu ona karta husi PNTL hafoin buska no apreensaun
Nia hatutan, to’o agora Ministéria Públiku no PNTL apreende hela ekipamentu kumputadór ne’ebé ligadu ho sistema finansa sentrál nian, entaun sira-nia atividade to’o agora seidauk bele hala’o, tanba de’it sira labele asesu ba sira-nia osamentu.
“Entaun, ami husu ba PNTL no Ministéria Públiku atu divolve hikas sasán sira ne’. Ami haruka ona karta ba Prokuradór Repúblika to’o agora seidauk iha resposta. Ami husu para devolve sasán sira-ne’e, nune’e ami bele ezekuta Osamentu Jerál Estadu (OJE), no ami labele empata atividade estájiu, peskiza no mós ensinu universidade nian,” mia dehan.
Nia konsidera, intervensaun ida-ne’e demaziadu no la merese atu akontese, maibé horisehik nia simu ona karta ida husi komandante Jerál Polísia Nasionál Timor-Leste ne’ebé husu deskulpa ba intervensaun ne’e, entaun ida-ne’e buat di’ak.
Tanba ne’e, nia apela para ba oin karik prosesu sira hanesan ne’e labele hatudu ho forsa ne’ebé boot, orsida ita-nia sosiedade tau hela intervensaun hanesan ho situasaun uluk iha tempu koloniál, nune’e sira lakohi ida-ne’e atu kontinua akontese, tanba nasaun ne’e livre ona presiza tenke trata sidadaun sira ho dignu ho respeitu.
“Buska ne’ebé sira halo la merese, prosesu legál ne’e ami prontu koopera no resposabiliza saida maka akontese, maibé maneira ida intervesaun mak ami la konkorda, ami konsidera demaziadu no deznesesáriu,” nia dehan.
Enkuantu, parte PNTL husu ona deskulpa tanba sira rekoñese intervensaun la merese ba ho forsa boot no sira buska ne’e para atu sustenta sira-nia informasaun atu bele fó akuzasaun.
“Tanba ami mós supremitidu hakfodak enkuantu Polísia mai ho kontinénsia ne’ebé boot, no mai ho armada. Hanesan fali, ami UNTL ne’e terorista mak iha ne’ebá, reitór mak hanesan terrorista nia boot iha UNTL,” nia hateten.
Notísia Relevante: PNTL halo buska no apreensaun ba Reitór UNTL inklui kargu xefia na’in-lima
Jornalista : Alexandra da Costa
Editór : Cancio Ximenes
