DILI, 20 Agostu 2025 (TATOLI)—Soldadu Forsa Espesiál, Tony Wills, konsidera, Forsa Armada Libertasaun Nasionál Timor-Leste (FALINTIL) konsege manán ema-nia fuan no hanoin iha tempu rezisténsia.
“Sira-ne’e nunka para atu luta, sira nunka rende. FALINTIL sira halo funu gerilla, iha tipu gerilla, sira manán ema-nia fuan no hanoin. Entaun, ha’u hanoin se buat ruma ema apreende ona husi FALINTIL, katak ita-boot sei la manán liberdade no demokrasia,” Tony Wills, hato’o ba jornalista sira, iha ámbitu serimónia aniversáriu ezisténsia FALINTIL ba dala-50, iha Tasi-tolu, Kuarta ne’e.
Notísia relevante : FALINTIL menus rekursu maibé reziste nafatin luta ba ukun-aan
Tony Wills dehan, Forsa australianu durante halo misaun iha Timor-Leste nota katak FALINTIL nia luta susesu tebes.
“Ha’u hanoin ida-ne’e susesu tebes, ida-ne’e fantástiku ba ami-nia grupu husi Austrália. Ida-ne’e sai misaun ida-ne’ebé susesu, susesu ho Austrália ne’ebé apoia Timor. Kuandu ita haree ba ohin loron, ema sivíl, labarik, no feto sira iha progresu iha sidade Dili. Ami orgullu boot atu haree ida-ne’e ohin loron,” nia akresenta.
Veteranu australianu sente orgullu bele hola parte iha selebrasaun loron istóriku Timor nian.
“Ami iha fiar ne’ebé maka’as tebes iha independénsia Timor-Leste nian no ema Austrália ida-idak apoia ho sólidu ninia futuru. Ita hein katak ita bele apoia Timor hanesan mós Militár iha área sira seluk hanesan iha saúde, medisina no iha formasaun defeza,” nia katak.
Jornalista : Osória Marques
Editora : Julia Chatarina
