DILI, 21 Agostu 2025 (TATOLI)—Federasaun Futeból Timor-Leste (FFTL) kontinua halo preparasaun ba kompetisaun Liga Futeból Timor-Leste Feminina ne’ebé tuir planu sei realiza iha findu tinan-ne’e.
Diretór Kompetisaun Eventu Federasaun Futeból Timor-Leste (FFTL), João Campos esplika preparasaun ba kompetisaun referida kuaze konkluidu ona maibé seidauk kanaliza informasaun ba klube sira tanba sei hein karta pedidu kona-ba utilizasaun kampu ne’ebé seidauk hetan resposta husi Ministériu Juventude, Desportu, Arte no Kultura (MJDAK).
“Kompetisaun Liga Futeból Feminina sei realiza jogu 90 nune’e tuir kalkulasaun husi Komisaun Organizadora presiza uza kampu menus liu rua no atualmente sei iha mudansa kalendária ne’ebé tuir loloos sei realiza iha inísiu fulan-Setembru,” Diretór Kompetisaun FFTL informa ba TATOLI iha ninia kna’ar fatin, Bairros dos Grilos, Kinta ne’e.
Campos relata, tuir planu, kompetisaun referida sei hahu ho jogu play off ne’ebé sei kompete husi klube tolu hanesan São José FC, Na’in-Feto FC no VDL FC iha-ne’ebé ekipa rua mak sei selesionada hodi kompleta tan klube ualu seluk nune’e hamutuk klube sanulu mak sei kompete iha Liga Futeból Feminina.
Notísia relevante: Selesaun Nasionál Futeból Feminina derrota 7-0 kontra Filipina
FFTL rasik iha fulan-Juñu hato’o ona pedidu utilizasaun kampu futeból tolu hanesan Estádiu Munisipál Dili, Estádiu Manatutu no Gleno ba MJDAK mezmu seidauk hetan resposta no tuir planu liga referida sei realiza durante semana-18 (fulan-neen) hanesan semana-ida sei realiza jogu lima no kada klube sei kompete jogu 18.
“Tuir planu jogu play off sei realiza iha kampu Lalenok, Markoni,” Campos tenik.
Entretantu, FFTL sei aloka orsamentu hamutuk rihun $200 ne’ebé hetan apoia husi FIFA liuhosi Asian Football Confederation (AFC) ne’ebé aleinde utiliza ba kompetisaun, orsamentu referida sei apoia mós ba subsídiu no akomodasaun ba kada klube hamutuk rihun $7 no apoia adisonál ba preparasaun $350 ba kada klube.
Jornalista: Natalino Belo
Editór: Xisto Freitas da Piedade
