DILI, 21 Agostu 2025 (TATOLI)–Institutu Nasionál Kombate HIV-SIDA (INCSIDA, sigla portugés) kontinua tau prioridade ba kombate Human Immunodeficiency Virus – Acquired Immunodeficiency Syndrome (HIV-SIDA) iha tinan 2026.
“Primeiru-Ministru, Kay Rala Xanana Gusmão husu tanba preokupa loos tanba ita Timor populasaun millaun $1,3 de’it maibé ita-nia poténsia sirkulasaun HIV ne’e maka’as loos, se ita la kuidadu ita-nia joven agora iha Timor ne’e, loron-ida ema mak mai ukun fali tanba ita kona HIV hotu. Tanba ne’e, ami propoin adisionál $575.000 hodi hasa’e atividade sira iha munisípiu, postu, suku no aldeia sira no atu fó formasaun ba pesoál ne’ebé mak halo teste ba ema ho HIV ne’e,” Prezidente INCSIDA, Daniel Marçal, hato’o halo aprezentasaun orsamentu Komité Revizaun Orsamentu (KRO) 2026, iha Ministériu Finansa, Aitarak-laran, Kinta ne’e.
Nia dehan, presiza halo atividade sosilizasaun barak liután ho objetivu atu proteje ema labele kona-ba HIV no proteje ema sira ne’ebé kona ona HIV labele infetadu vírus ne’e.
Notísia relevante : INCSIDA-AMD sensibiliza prevensaun vírus HIV-SIDA ba autoridade sira
Ekipa INCSIDA ho otimista hato’o planu prioridade iha reuniaun KRO, ho hanoin ida katak sei iha konsiderasaun.
“Ita hein de’it aprova ka la aprova, maibé ohin Primeiru-Ministru mós haree no sente katak problema ne’e problema nasionál, entaun ita presiza haree hamutuk hodi rezolve,” nia katak.
Antes ne’e, INCSIDA hetan alokasaun millaun $1,058 iha orsamentu tinan 2025 nian, ne’ebé daudaun ezekuta ona 63%.
Jornalista : Arminda Fonseca
Editora : Julia Chatarina
