DILI, 21 Agostu 2025 (TATOLI) – Institutu Superiór Kristál (ISC) hamutuk ho parseiru hanesan Universidade Kristen Indonezia (UKI) no ESSA Unggul, Kinta ne’e, asina akordu serbisu hodi halo serbisu kooperasaun.
Objetivu hosi asina akordu ne’e atu iha futuru bele implementa no halo sensibilizasaun ba programa fisioterapia ba komunidade.
“Ohin ISC reprezenta husi dekana fakuldade saúde no Xefe Departamentu Fisioterapia, asina akordukooperasaun ho universidade rua husi Indonézia, atu implementa programa fisioterapia ne’e ba komunidade iha área rurál,” Prezidente Ezekutivu Fundasaun Kristál, Agustinho dos Santos Gonçalves, informa, iha salaun ISC, Balide.
Notísia relevante : ISC hakarak esplora fisioterapia hodi hadi’a ema-nia kualidade moris
Programa referidu ba dahuluk ISC foin loke iha Timor-Leste ho objetivu tu haree ba povu nia moris di’ak.
“Programa fisioterapia, ami mak loke ba dahuluk iha Timór-Leste, tanba ne’e ami sei haruka ami-nia estudante sira tun ba postu no eskola sira, hodi halo sosializasaun kona-ba fisioterapia ba sosiedade, estudante no joven sira, atu oinsá kuidadu sira-nia an,” nia akresenta.
Prezidente fundasaun esplika, fisioterapia hanesan forma ida husi kuidadu saúde ne’ebé mak atu restaura funsaun isin nian ne’ebé mak ladi’ak tanba kanek, moras, ka kondisaun sira seluk.
“Fisioterapia bele fó asisténsia ba ita no bele ajuda redus moras no inflamasaun, hadi’a mobilidade no forsa muskulár, restaura funsaun isin nian ne’ebé normál, hadi’a kualidade moris, no fizioterapia bele uza métodu oioin, hanesan terapia fíziku ezersísiu, masajen, liuliu ba timoroan ne’ebe ladun kontrola asuntu sira ne’e,” nia katak.
Iha fatin hanesan, estudante husi Departamentu Fisioterapia ISC, Pasquela de Araújo, hateten, liuhusi semináriu referidu ne’e bele aprende no adapta ona kona-ba fisioterapia.
“Ami aprende ona kona-ba fisioterapia husi oradór sira ne’ebé fahe ona sira nia esperiénsia liu-liu kona-ba fisioterapia ne’e rasik, ida-ne’e hanesan bukae ida ba ami iha depertamentu foun fisioterapia iha ISC, nune’e bainhira iha prosesu aprendizajen fisioterapia ami bele kompreende ona kona-ba nia funsaun sira,” nia espresa.
Aleinde ne’e, nia kompremete ba futuru sira sei implementa programa referida ba komunidade, liuliu estudante ne’ebé seidauk koñese kona-ba fisioterapia.
“Tanba dalabarak ita iha Timor komprende katak fisioterapia ne’e hanesan (Tukan urut), maibé fisioterapia iha funsaun oinoin, bele mós iha Ospitál Referál, klínika sira inklui mós iha parte jogu iha FFTL, nune’e ba oin ami sei implementa saida mak ami aprende ona kona-ba fisioterapia, ba ita-nia komunidade liuliu ba Estudante sira ne’ebé seidauk koñese fisioterapia,” nia tenik.
Jornalista : Osória Marques
Editora : Julia Chatarina
