DILI, 21 Agostu 2025 (TATOLI)—Institutu Superiór Kristál (ISC, sigla portugés) simu ona subvensaun públika ho mantante $123.750 husi Ministériu Ensinu, Superiór Siénsia No Kultura (MESSK), ne’ebé mak sei utiliza ba programa prioridade tolu.
“Osan ne’e dahuluk sei fó formasaun lian portugés, no apoiu ba dosente sira, nomós estudante sira ne’ebé mellór klasifikadu iha sira-nia akedémiku,” Reitór ISC Sebastião Pereira, informa ba jornalista sira, iha auditóriu ISC, Balide, Kinta ne’e.
Nia dehan, husi orsamentu ne’e, ministériu transfere ona 50%, nune’e bainhira nia ezekusaun dahuluk ne’e ezekuta ho di’ak, sira sei transfere tan 50%.
Notísia relevante : ISC hakarak esplora fisioterapia hodi hadi’a ema-nia kualidade moris
Estudante ativu iha institutu ne’e hamutuk 7.770, kompostu husi kampus sentrál to’o kampus polo sira iha munisipiu Baukau, Aileu no Same, ho dosente kuaze 300-resin.
ISC iha fakuldade rua mak hanesan, fakuldade siénsia edukasaun iha departamentu 10 no fakuldade saúde iha departamentu 3, inklui mós programa mestradu nian.
Governu liuhusi Ministériu Ensinu Superiór, Siénsia no Kultura (MESSK) prepara millaun $2 ba programa subvensaun públika ba Institutu Ensinu Superiór (IES) iha Timor-Leste.
“Tinan ne’e MESSK prepara millaun $2 ba Institutu Ensinu superiór sira maibé ba tinan ne’e subvensaun ne’e ita prevee buat tolu de’it, ida ba estudante sira, fó formasaun ba ita-nia dosente no ajuda mós dosente sira,” Ministru Ensinu Superiór, Siénsia no Kultura, José Honório da Costa Pereira Jerónimo, informa ba Ajénsia TATOLI iha ninia knaar fatin, Kolmera, foin lalais ne’e.
Governante ne’e husu IES atu submete relatóriu nune’e bele distribui subvensaun públika.
“Tanba ne’e, universidade bele hatama relatóriu mai atu bele fó subvensaun públika,” nia katak.
Jornalista : Osória Marques
Editora : Julia Chatarina
