DILI, 21 Agostu 2025 (TATOLI)-Ministériu Transporte Komunikasaun (MTK) prepara hela proposta-lei seguransa sibernétika ba Parlamentu Nasionál hodi diskute no aprova, tanba konsidera importante ba Nasaun relasiona ho trasnformasaun dijitál.
“Teknikamente ha’u orienta ona tékniku no jurista sira iha ministéiru hodi prepara proposta-lei kona-ba seguransa sibernétika”, ministru Miguel Manetelo ba jornalista sira hafoin partisipa lansamentu Telemor 5G di’ak liu iha Sentru Konvensaun Dili (CCD, siglá portugés), kinta-ne’e.
Nia konsidera lejislasaun ne’e atu proteje kestaun seguransa Nasaun ho transformasaun dijitál. “La’ós urjente, maibé importante ba país relasiona ho transformasaun dijitál”, afirma ministru.
MTK iha fulan-Fevereiru liuba realiza ona konferénsia internasionál hodi konvida Nasaun Austrália, Vietname, Kambodia ho Indonézia, fahe esperiénsia oinsá harii ajénsia nasionál seguransa sibernétika.
Governante ne’e dehan, kona-ba lei krime sibernétika no lei protesaun dadus parte Ministériu Justisa mak prepara. “Tanba, krime sira ne’e ataka dadus, aban bainrua uza iha ID úniku halakon hotu, inklui krime sira seluk”.
Antes ne’e, Ministru Justisa, Sergio Hornai, dehan prepara hela lei krime sibernétika hodi bele kontrola identidade falsa ataka ema seluk ho linguajen la edukativu iha mídia sosiál.
Notísia relevante: MJ prepara ona ezbosu lei sibernétika kontrola ID falsa
Jornalista : Nelson de Sousa
Editora : Rita Almeida
