Ramos-Horta kondekora Saudozu Prezidente Nicolau Lobato ho “Grande Kolar Orden Timor-Leste”
DILI, 21 Agostu 2025 (TATOLI)—Prezidente Repúblika, José Ramos-Horta, kuarta ne’e, kondekora titlu póstumu ho onra aas liu nasaun nian ba eroi saudozu Prezidente Nicolau Lobato inklui eroi na’in-tolu (3) seluk ne’ebe luta ba independénsia Timor-Leste nian, iha Serimónia solene aniversáriu loron FALINTIL ba da-50 (20 Agostu 1975-2025) ne’ebé hala’o iha Tasi-Tolu.
Notisia Relevante: Ramos-Horta husu harii jardin eroi iha Binani-Mindelo hodi fó omenajen ba Nicolau Lobato
Tuir Dekretu Prezidente Repúblika Nú. 82/2025, ne’ebé asina iha loron 19 fulan-Agostu tinan 2025, iha Palásiu Prezidensiál Nicolau Lobato, Prezidente Ramos-Horta kondekora titlu póstumu ho Grande Kolar Orden Timor-Leste nian ba Saudozu Prezidente Nicolau dos Reis Lobato “Tau Fui.”
Aleinde ne’e, tuir Dekretu Prezidente Repúblika Nú. 83/2025, ne’ebé asina mós iha loron 19 fulan Agostu, Prezidente Ramos-Horta kondekora titlu póstumu ho Grau Kolar Orden Timor-Leste nian ba Kombatente Libertasaun Nasionál na’in tolu ne’ebé respeitadu mak hanesan (1) Joaquim Saldanha “Naha Berek”, (2) Artur do Nascimento “Tripas” no (3) Dulce Cruz “Wewe Sahe”
“Ohin, iha aniversáriu FALINTIL nian ba dala 50, ita fó onra ba mandatu konstitusionál hodi rekoñese lideransa supremu Prezidente Nicolau Lobato nian no korajen imensu husi eroi sira hanesan Joaquim Saldanha, Artur do Nascimento, no Dulce Cruz. Sira-nia legadu mak livre no soberanu Timor-Leste ne’ebé ita moris iha ohin loron,” PR Ramós-Horta hateten liuhusi nota imprensa ne’ebé Agência TATOLI asesu, ohin.
Serimónia ida-ne’e marka pasu signifikativu ida iha kompromisu Estadu nian hodi fó onra ba pesoál hotu-hotu ne’ebé dedika sira-nia moris ba independénsia Repúblika Demokrátika Timor-Leste.
Notísia Relevante: Saudozu Prezidente Nicolau Lobato nu’udár líder vizionáriu
TATOLI
