DILI, 21 Agostu 2025 (TATOLI)-Ministru Defeza, Kontra Almirante Donaciano Costa Gomes Pedro Klamar Fuik, hateten Governu Timor-Leste hato’o prontidaun halo kooperasaun ho Governu Brunei Darussalam iha área Defeza Militár.
“Hasoru malu ida-ne’e nu’udar primeiru kontaktu entre Timor-Leste ho Brunei husi ema ho ema, depois sei haree. Hakat-ida ho fali hakat seluk, labele halai, labele haksoit, kuandu nune’e bele monu. Tanba ida-ne’e mak vizita ida-ne’e importante tebetebes ba ita-nia relasaun”, ministru hatete ba jornalista sira hafoin simu vizita nia omologu husi Brunei Darussalam iha Ministériu Defeza Fatuhada, kinta-ne’e.
Enkontru bilaterál ne’e, nia omologu Awang Halbi bin Haji Mohd Yussof akompaña ho Xefe Estadu Maiór Jenerál Forsa Armada Brunei nian, Muhammad Haszaimi bin Bol Hassan, hafoin partisipa tinan-50 loron FALINTIL iha Tasi-tolu.
Nia dehan agradese tanba partisipa ona loron FALINTIL hamutuk ho povu Timor.
Ministru hatutan vizita ne’e hanesan kontinuasaun husi Sultan Hassanal Bolkiah foin daudaun ne’e hodi fortifika relasaun bilaterál.
“Hanesan ita-boot sira hatene Brunei Darussalam sempre apoia solidariedade hamutuk ho ita. Ita nia líder sira koñese mós majesrade (liurai) ne’ebé mak mai vizita ona ita-nia rai, sira (Ministru Defeza Brunei) iha oportunidade ida-ne’e mai vizita ita para partisipa mós iha ita-nia festa”, dehan nia.
Iha fatin hanesan Ministru Defeza Burnei Darussalam, Awang Halbi bin Haji Mohd Yussof, hatete agradese ba nia omologu ne’ebé simu ona sira ho di’ak tebes.
“Ha’u hato’o obrigadu ba oportunidade ida-ne’e, ba eselénsia Ministru Defeza Timor-Leste nia atendimentu, ospitalidade ne’ebé di’ak tebetebes durante ha’u no ami-nia delegasaun nian estádia iha Timor-Leste”, katak nia.
Nia dehan momentu ne’e hanesan vizita dahuluk. “Ida-ne’e nu’udar memória ba ami no ida-ne’e hanesan ha’u-nia vizita dahuluk mai iha-ne’e ho ha’u-nia delegasaun sira. Momentu ida-ne’e hanesan testamuña hodi haforte di’ak liu relasaun bilateral”.
Notísia relevante: Hametin kooperasaun bilaterál, Horta ho Xanana simu direta Liurai Brunei Darussalam
Jornalista : Natalino Costa
Editora : Rita Almeida
