Veteranu Vikeke sente triste jerasaun foun ladún partisipa Komemorasaun Loron FALINTIL
VIKEKE, 21 Agostu 2025 (TATOLI)—Veteranu Munisípiu Vikeke, Mateus Soares sente triste jerasaun foun ladún partisipa serimónia komemorasaun loron Forsa Armada Libertasaun Nasionál Timor-Leste (FALINTIL) ba dala-50 (20 Agostu 1975-20 Agostu 2025), iha Munisípiu Vikeke.
“Loron 20 Agustu 1975 nu’udár loron ida-ne’ebé importante ba ita-nia lutu Timor nian, maibé ha’u sente triste tanba iha komemorasaun loron FALINTIL ne’e juventude hanesan jerasaun kontinuadora la marka prezensa,” Mateus Soaras ba TATOLI iha Postu Vikeke Vila, Kinta ne’e.
Mateus hakarak tatoli ba autoridade lokál liuliu ba prezidente autoridade, administradór postu, xefe suku no xefe aldeia sira katak selebrasaun loron istóriku ne’e konvida direta ba suku nune’e xefe suku sira autoriza joven sira partisipa hodi joven sira bele halakon hanoin fahe malu.
“Eventu sira-ne’e tenke hato’o ba suku hodi hatutan ba ita-nia joven sir. Dalaruma ita la fó hatene ba suku, tanba ne’e mak joven sira la partisipa iha serimónia ida-ne’e,” nia hato’o.
Notísia relevante: Partisipasaun povu Bobonaru iha serimónia loron FALINTIL ba dala-50 la másima
Iha fatin hanesan, vendedora Eva Freitas sente kontente tanba komemorasaun loron FALINTIL autoridade sira realiza feira ba komunidade hodi fa’an produtu lokál hodi festeja loron FALINTIL ba dala-50 ne’e.
“Ha’u sente kontente partisipa selebrasaun loron FALINTIL. Iha selebrasaun ne’e autoridade sira loke feira produtu lokál ba ami, hodi ami fa’an ami-nia produtu lokál sira-ne’ebé ami iha,” nia haktuir.
Hatán ba lamentasaun ne’e, Prezidente Komisaun Organizadóra ba selebrasaun loron FALINTIL Munisípiu Vikeke, Acacio de Sousa haktuir katak kona-ba partisipasaun ba serimónia selebrasaun loron FALINTIL parte komisaun distribui konvite ba postu lima, maibé dalaruma iha preokupasaun tanba ne’e mak komunidade la partisipa.
“Ami konvida hotu postu lima, veteranu, autoridade lokál, juventude, maibé sira la partisipa. Bá-oin ita espera ita-nia komundiade bele partisipa loron istóriku sira-ne’e,” nia hato’o.
Jornalista: Vitorino Lopez da Costa
Editór: Xisto Freitas da Piedade
