Agrikultór Suai Loro husu MAPPF apoiu mákina koa no kuda hare
KOVALIMA, 22 Agostu 2025 ( TATOLI)–Agrikultór Suai Loro husu Ministériu Agikultura , Peska, Pekuária no Floresta (MAPFF) atu fó apoiu mákina koa no kuda hare, no mós hadia irrigasaun, nune’e bele hasa’e produsaun agrikola iha munisípiu Kovalima.
“Ami nia preokupasaun kona-ba atu hadia irrigasaun kleur on, maibé to’o ohin loron mós seidauk iha rezultadu no presiza mós apoiu makina, tanba durante ne’e ami aluga de’it tratór liman husi privadu sira, dala-ruma mós la to’o”, agrikultór, Emlio Nahak, hato’o iha Suai Loro.
Ho menus fasilidade agrikola, difikulta agikultór sira atu kuda hare, tanba hare ne’ebé karii la konsege kuda hotu, tanba agrikultór sira kuda hare aluga de’it makina, nune’e kada tinan menus hasa’e produsaun hare kulit. Ho apoiu fasilidade agrikola hanesan mákina kuda no koa hare bele hamenus gasta ba aluga. Difikuldade seluk mak menus bee.
Xefe Suku Suai Loro, Manuel Gomes da Costa, reforsa ho mensajen ne’ebé hanesan. “Governu ajuda ekipamentu agrikola ba agrikultór sira, ami prontu tau marka no ami sei labele sosa ona foos, tanba ami bele hasa’e produsaun agrikola hanesan hare kulit iha munisípiu Kovalima iha rai ne’ebe mak sei abandona”.
Nia dehan rai barak mak abandona ho razaun problema irrigasaun no falta fasilidade fila rai.
Bazeia ba dadus, rai ektare 814 , husi númeru ne’e seidauk halo kultivasaun rai ektare 514, tanba bee la sufisente.
Hatán ba kestaun ne’e, Sekretáriu Estadu Peskuária, José Vieira de Araújo, dehan anota preokupasaun komunidade no xefe suku.
“Preokupasaun ne’ebé mak ohin hato’o ita anota, tau planu maske sei la realiza iha tinan ida nia laran bazeia ba orientasaun husi Primeiru Ministru, Kay Rala Xanana Gusmão, sei tau iha planu kada tinan hodi haree prióridade hamutuk ho tékniku hodi halo mapamentu”, nia hatán.
Notísia relevante: MAPPF kolleta hare variedade nakroma ho ektare rua-resin iha Suai Loro
Jornalista : Celestina Teles
Editora : Rita Almeida
