DILI, 22 Agostu 2025 (TATOLI)–Komisaun Nasionál Juventude Katólika Timor-Leste (CNJCTL-sigla portugeza) liuhosi Komisaun Organizadora Sinodal iha Sesta ne’e realiza simulasaun atu simu Krúz Joven Internasionál nu’udár parte preparasaun ikus.
Diretór Ezekutivu CNJCTL, Padre Francisco Indra do Nascimento Tey-Seran esplika prezensa iha Aeroportu Internasionál Prezidente Nicolau Lobato Komoro atu halo simulasaun nu’udár parte preparasaun ikus hodi simu Krúz Joven Internasionál ne’ebé sei vizita Timor-Leste iha loron aban, Sábadu (23 Agostu).
“Husu ita hotu nia kolaborasaun nune’e Krúz ne’e to’o mai iha situasaun hakmatek nia laran,” Padre Francisco Indra informa liuhosi konferénsia imprensa iha Aeroportu Internasionál Prezidente Nicolao Lobato Komoro.
Notísia relevante: CNJCTL kontinua halo preparasaun simu Krúz Joven Internasionál
Nia relata katak durante preparasaun Komisaun Organizadora liuhosi Sinodal koopera ho Governu através Ministériu Negósiu Estranjeiru no Kooperasaun (MNEK) inklui Polísia Nasionál Timor-Leste (PNTL) ligadu ho inísiu no finde vizita Krúz Joven Internasionál.
Amu esplika simulasaun referida ho objetivu atu halo korresaun ba prosesu hotu kona-ba simu Krúz Joven iha Aeroportu Komoro nune’e hadi’a di’ak liután ho koletivu.
“Hafoin ramata iha aeroportu sei kontinua iha Igreja Katedrál,” Padre Indra akresenta.
Aleinde ne’e, Diretora Jerál Protokolu no Konsulada MNEK, Josefina Tilman hateten MNEK liuhosi protokolu serbisu hamutuk ho CNJCTL liuliu ekipa Sinodal ne’ebé sei foku ba protokolu relasiona ho prezensa Kruz Joven Internasionál ne’ebé konsideradu importante ba juventude Timor-Leste.
“Ami tenta fó atendomentu ne’ebé másimu nune’e eventu ne’e bele sussesu,” Josefina informa.
Tuir ajenda, Krúz Joven Internasionál to’o iha Aeroportu Internasionál Prezidente Nicolau Lobato Komoro purvolta tuku 13:00 Otl ne’ebé simu ho saudasaun kumprimentu husi Bispu Dioseze Dili, Dom Virgílio Kardeál do Carmo da Silva hamutuk ho membru Governu sira no hato’o benvindu ba delegasaun husi Koreia Súl ne’ebé kontinua kedas entrega Krúz ba Kreda Timor.
Hafoin ne’e, tara tais no simu Krúz Joven Internasionál ho kultura Timor, prosesaun husi Aeroportu ba Igreja Katedrál no simu ho liafuan benvindu husi Dom Virgilo Cardeál do Carmo da Silva, SDB.
Entretantu, Krúz Joven Internasionál iha Timor-Leste durante loron-hitu, hahú husi 23-30 Agostu iha-ne’ebé sei vizita mós Dioseze Maliana iha loron 25-29 Agostu antes dezloka husi Timor-Leste bá Thailándia iha 30 Agostu.
Jornalista: Natalino Belo
Editór: Xisto Freitas da Piedade
