DNFM: Fasilidade saúde presiza liu item esensiál atu atende pasiente sira
DILI, 22 Agostu 2025 (TATOLI)—Diretór Nasionál Farmásia Medikamentu, Delfim Ferreira, hateten item ne’ebé fasilidade saúde sira presiza liu item esensiál tenke disponivel hanesan ai-moruk Amoxcilin no Paracetamol atu atende pasiente sira.
“Item ne’ebé fasilidade saúde presiza liu mak amoxcilin, paracetamol, Co-trimoxazole, ida-ne’e mak tenke disponivel ka ita bele dehan item esensiál ne’ebé mak disponivel husi kedas postu saúde to’o iha HNGV. Item sira seluk depende ba sira nivel de utiliizasaun, ezemplu antibiotiku balun sira labele iha no só bele disponivel iha Hospital HNGV, atu nune’e evita numeru rezisténsia antibiotiku ne’ebé mak iha ita-nia fasilidade saúde sira. Ezemplu, antibiotiku Meropenem ita fó ba HNGV de’it, ita labele fó ba sentru saúde sira tanba atu evita rezisténsia antibiotika,” Delfim Ferreira hateten ba jornalista sira, ohin.
Nia dehan, servisu rutina ne’ebé mak husi sentru saúde postu saúde no ospital sira kada fulan sira halo sira-nia pedidu regulár atu bele hetan ai-moruk konsumaveis sira-ne’e.
“Ami-nia responsabilidade farmásia sira iha kada sentru iha kada munisípiu ne’e estabelese, entaun kada fulan sira iha oráriu ne’ebé mak fixu ona no pedidu mai liuhusi plataforma M-suplay, ita bolu dehan eletroniku. Tanba, agora daudaun pedidiu liu husi m-suplay, sira input iha ne’eba, depois DNFPM bele halo verifikasaun aprova no automatikamente INFPM bele halo preparasaun ba iha ai-moruk no konsumaveis sira,” nia esplika.
Totál fasilidade hotu-hotu iha oráriu katak kada semana ospital lima tenke subemte relatóriu, inklui sentru saúde 70-resin no postu saúde 200-resin, sira ne’e iha hotu oráriu fixu ona atu hato’o sira-nia pedidu mai nasionál.
“Sira mós iha pedidu emerjénsia no balun fó tuir pedidiu manuál ezemplu item ida ka rua, hato’o ohin no aban, sira tenke atende lalais pasiente. Hanesan, ita iha atividade tratamentu médiku espesialista sira, entaun ida-ne’e ita labele hein to’o fulan, ita tenke atende kedas ohin ka aban,” nia dehan.
Jornalista : Felicidade Ximenes
Editór : Cancio Ximenes
