KHK distribui fini modo ba Grupu Tatoli iha Bahalaraua’in
VIKEKE, 22 Agostu 2025 (TATOLI)—Organizasaun naun Governamentál lokál Knua Haberan Komunidade (KHK) distribui fini modo ba Grupu Tatoli husi Suku Bahalaraua’in, Postu Administrativu Vikeke, Munisípiu Vikeke.
Diretór Ezekutivu KHK, Augusto Pinto hateten KHK hamutuk ho parseiru Gabinete Apoia Sosiedade Sivíl (GASS) apoiu fini modo no materiál ba Grupu Tatoli ne’ebé hala’o atividade ortikultura iha Suku Bahalarau’ain.
“Ohin ami halo distribuisaun fini no ekipamentu sira hanesan profil bee nian ida, mangeira no gembor ba Grupu Tatoli ne’ebé hala’o ativdade ortikultura ho medida 40×40 no ita-nia komunidade iha interese hakarak kuda modo. Tanba ne’e, ami apoia sira hodi sira bele implementa atividade ortikultura,” Augusto Pinto ba TATOLI iha Postu Vikeke Vila, Sesta ne’e.
Notísia relevante: Fundasaun KHK realiza kompetisaun tein ba ai-han tradisionál iha Viqueque
Agusto subliña ativdade ortikultura ne’e bainhira rezultadu di’ak, grupu sei fa’an filfali hadi’a sira-nia rendimentu ekonomia família.
“Ami sei kontinua akompaña ita-nia grupu ne’e durante tinan rua hodi halo monitorizasaun, atu grupu nia atividade ortikultura no rai no impresta osan bele la’o di’ak,” nia akresenta.
Aleinde ne’e, Augusto informa, apoia ba Grupu Tatoli atu hala’o atividade ortikultura hodi hasa’e kuantidade modo hodi fornese ba merkadu sira iha Munisípiu Vikeke.
Iha fatin hanesan, Adjunta Koordenadora Gabinete Apoia Sosiedade Sivíl (GASC-sigla portugeza), Yasinta Lujinha C. das Regras haktuir GASC koopera ho parseiru KHC la’o tinan barak ona no kontinua hetan konsiderasaun tanba servisu ne’ebé di’ak tebes.
“Avaliasaun kada tinan ba KHK hatudu rezultadu katak apoiu sira-ne’e ba grupu iha duni benefísiu ba ita-nia komunidade,” nia hato’o.
Entretantu, apoia ne’ebé oferese husi Grupu Tatoli kompostu husi enxada lima (5), kanuru boot lima (5), katana lima (5), garfu boot lima (5), gembor lima (5), fiu eletrisidade rolu rua, tali rafia, arame bronjong ualu (6), bomba bee ida, torneira haat, polypipe ida, mangeira tolu. Fini modo kompostu modo-mutin, kanku, bayam, baria, brinjela, ai-manas, tomate, salada, senoura, repollu no salsa.
Grupu Tatoli totál membru hamutuk na’in-25, ne’ebé hala’o atividade rua hanesan ortikultura, rai no impresta osan iha Suku Bahalaraua’in.
Jornalista: Vitorino Lopez da Costa
Editór: Xisto Freitas da Piedade
