DILI, 22 Agostu 2025 (TATOLI)-Prokuradór Jerál Repúblika, Nelson de Carvalho, hatete objetu ne’ebé autoridade judisiál sira apreende sei la devolve bainhira investigasaun seidauk konklui.
“Sasán sim. Ida-ne’e iha hela faze investigsaun, orsida investigasaun mak Ministériu Públiku sei haree ida-ne’e bele fó fila, entaun fó fila, sira ne’ebé seidauk fó fila, tanba sei halo ezaminasaun”, dehan nia ba jornalista sira iha ministériu finansa, sesta ne’e, hafoin aprezenta orsamentu adisionál iha Komité Revisaun Orsamentu.
Ulun boot ministériu públiku ne’e konfirma, simu duni karta husi Reitór Universidade Nasionál Timor Lorosa’e (UNTL), husu devolve komputadór ne’ebé autoridade polisiál sira apreende iha prosesu buska no apreensaun.
Notísia relevante: PNTL halo buska no apreensaun ba Reitór UNTL inklui kargu xefia na’in-lima
“Karta ne’e sim, haruka ona mai, más ne’e lá’os buat-ida impresta sasán, se tama ona ba iha konsiderasaun buat ruma ne’ebé iha indísiu tenke halo ezame”, nia konfirma.
Nia husu atu kumpriende tramitasaun prosesuál. Tanba, prokuradór titulár tenke haree, halo investigasaun klean, arrola sasin sira-nia deklarasaun, entaun presiza tempu. Kuandu kazu ne’e iha indísiu, kontinua ba akuzasaun, laiha mak sei arkiva.
“Buska ba apreensaun ne’e tanba iha indikasaun, entaun hanesan ha’u dehan Ministériu Públiku tenke halo ezame laboratóriu atu bele dehan nia (komputadór) ne’e nia natureza ne’e saida, tanba saida mak nia envolve ba materiál informátika, tanba parese iha buat ruma iha ne’ebá”, nia subliña.
Notísia relevante: Reitór UNTL husu MP-PNTL devolve komputadór ne’ebé sira apreende
Jornalista : Natalino Costa
Editora : Rita Almeida
