DILI, 22 Agostu 2025 (TATOLI)-Provedória Direitu Umanu no Justisa (PDHJ, siglá portugés) iha proposta Orsamentu Jerál Estadu (OJE) 2026 husu adisionál rihun $540 durante reuniaun Komité Revizaun Orsamentu (KRO) iha Ministériu Finansa, sesta-ne’e.
Provedór Direitu Umanu no Justisa, Virgilio Guterres, hateten sira prepara ona planu no programa maibé tetu orsamentu tinan oin la sufisiente atu kobre nesesidade.
Nune’e pedidu adisionál ne’e tau iha kapitál menór hodi bele halo rekrutamentu, kompleta destakamentu pontu fokál iha munisípiu hotu inklui Ataúru, akizasaun transporte, materiál eskritóriu hanesan komputadór no seluk tan.
“Ohin, (KRO) la hatete konkorda ka-la’e”, hatán nia ba jornalista sira hafoin aprezenta proposta. PDHJ halo aprezentasaun ba nesesidade ne’e hodi bele hetan konsiderasaun.
Nia hato’o apresiasaun ba Governu tanba tetu tinan-oin hetan aumenta millaun $1.9 kompara ho tinan-ne’e.
Prioridade PDHJ ba tinan oin mak programa rua, dezenvolvimentu instituisionál no promosaun direitu umanu ho sub-programa hitu, atividade promosaun, prevensaun fiskalizasaun no halo investigasaun ba keixa no seluk tan.
Nia dehan, durante reuniaun membru KRO husu PDHJ atu halo edukasaun sívika ka formasaun ba joven sira, liuliu ne’ebé envolve iha grupu arte-marsiál atu prevene-an husi konflitu hodi labele prejudika ema seluk nia direitu.
“Entaun, ami hato’o sei akompaña polítika Governu nian, kona-ba arte-marsiál bainhira iha lei ruma sai ona, posivelmente halo kooperasaun ho Ministéiru Juventude Desportu Arte no Kultura (MJDAK)”, salienta.
Enkuantu PDHJ iha OJE 2025 hetan alokasaun millaun $1.5 to’o iha loron 21 Agostu ne’e ezekuta ona pusentu 55.
Notísia relevante: OJE 2025 : PDHJ propoin adisionál millaun $1,5
Jornalista : Nelson de Sousa
Editora : Rita Almeida
