DILI, 22 Agostu 2025 (TATOLI)-Provedória Direitu Umanu no Justisa (PDHJ, siglá portugés) husu ba Tribunál Rekursu (TR) atu halo fiskalizasaun abstrata ba diploma ministeriál númeru 17/2025 Juñu husi Ministériu Interiór (MI).
“Ohin, komunikasaun ho parte legál nian 90% loos ona, se la bibán lokraik ne’e, semana oin iha segunda ami hatama ona (pedidu husu fiskalizasaun abstrata) ba tribunál”, Provedór Direitu Umanu no Justisa, Vírgilio Guterres, dehan ba jornalista sira iha edifísiu Ministériu Finansa, sesta-ne’e.
PDHJ prepara ona ninia fundamentasaun husi parte legál hodi hato’o pedidu ba TR.
Antes ne’e iha loron 13 Agostu liubá, liuhusi konferénsia imprensa PDHJ solisita atu iha rekrutamentu ba membru foun Polísia Nasionál Timor-Leste (PNTL) labele iha diskriminasaun entre sidadaun timoroan.
Virgílio Guterres aprezenta asuntu ne’e relasiona ho kestaun balun ne’ebé mosu iha rekizitu ba rekrutamentu, liuliu kona-ba foti deklarasaun husi Konsellu Kombatente Libertasaun Nasionál, fotokópia kartaun identifikasaun pesoál no sertifikadu tama iha PNTL ba kandidatu sira ne’ebé nia inan no aman PNTL no rekizitu kandidatu klosan, eliminasaun kandidatu iha moras HIV/Sida no tuberkuloze ne’ebé kura ona menus husi fulan-12.
“Provedór levanta kestaun hirak ne’e, tanba afirmasaun sira ne’e la tuir prinsípiu konstituisaun nian artigu 16 ne’ebé hateten proíbe diskriminasaun”, katak nia.
Notísia relevante: Rekrutamentu ba membru PNTL labele diskrimina sidadaun – PDHJ
Jornalista : Nelson de Sousa
Editora : Rita Almeida
