VIKEKE, 22 Agostu 2025 (TATOLI)—Perfurasaun ne’ebé hala’o husi tékniku sira husi Provínsia Hunan, Xina, iha iha Suku Uma-Ki’ik, Postu Administrativu Vikeke Vila, Munisípiu Vikeke la hetan bee-moos, tan ne’e tékniku sira retira ona husi servisu.
Xefe Suku Uma-Ki’ik, Claudino Amaral haktuir perfurasaun ne’e hala’o 22 fulan-Jullu durante loron haat no antes halo perfurasaun ne’e tékniku sira teste tiha katak bee iha maibé ikusmai bee laiha.
“Tékniku sira konsege halo perfurasaun to’o metru 30, maibé la hetan bee. Nune’e sira retira la fó-hatene informasaun ruma ba ami autoridade lokál sira. Loloos sira bá ne’e informa ba ami atu ami bele hatene katak perfurasaun ne’e kontinua ka lae. Agora sira nonook bá tiha de’it,” Claudino Amaral hateten ba TATOLI iha Postu Vikeke, Sesta ne’e.
Notísia relevante: Abitante Uma-Ki’ik Viqueque konsumu bee mota durante tinan barak
Autoridade ne’e hatutan tékniku sira retiradu ona maibé ekipamentu ba perfurasaun bee-moos nian daudaun ne’e sei iha xefe aldeia nian uma.
Nia informa katak perfurasaun ida-ne’e mak la kontinua, komunidade Suku Uma-Ki’ik kontinua enfrenta difikuldade ba bee-moos no komunidade tenke depende bee-moos husi mota.
Tuir dadus, populasaun Suku Uma-Ki’ik ho totál uma-kain 801, populasaun na’in-3.715. Husi númeru ne’e, populasaun 98% asesu bee-mota no 2% asesu bee-posu ne’ebé komunidade ke’e rasik.
Suku Uma-Ki’ik kompostu hosi aldeia ualu hanesan Rai-Hun ho uma-kain 54 no populasaun na’‘in-240, Makadean uma-kain 100 no populasaun na‘in-478, Bahabunak uma-kain 103 no populasaun na‘in-457, Lua uma-kain 239 no populasaun na’in-1226, Baha Fou uma-kain 62 no populasaun na’in-307, Aina Ua’in uma-kain 58 no populasaun naiin-252, Maroman uma-kain 70 no populasaun na’‘in-309 no Idak Bein uma-kain 101 no populasaun na’in-444.
Jornalista: Vitorino Lopez da Costa
Editór: Xisto Freitas da Piedade
