VIKEKE, 22 Agostu 2025 (TATOLI)—Koodenadór Sekretaria Estadu Kooperativa (SEKoop) Munisípiu Vikeke, Albino da Costa Guterres informa SEKoop halo ona rejistu ba kooperativa hamutuk 20 ne’ebé eziste iha Munisípiu Vikeke ho kapitál hamutuk $2.698.196,43.
“Ami halo rejistrasaun ba kooperativa hamutuk 20. Sira-nia kapitál hamutuk millaun $2. Husi kooperativa 20 ne’e, ita-nia komunidade hamutuk 2.229 envolve ona iha kooperativa,” Albino da Costa ba TATOLI iha Postu Vikeke Vila, Sesta ne’e.
Koordenadór SEKoop Munisípiu Vikeke ne’e hatutan entre kooperativa 20 ne’ebé eziste, iha kooperativa haat (4) mak pasiva maski sira iha fundu, maibé sira-nia atividade tranzasaun mak la la’o. Kooperativa haat mak seidauk hetan legalidade husi notariadu.
“Kooperativa hamutuk haat (4) mak agora sei pasiva inklui kooperativa Chamau iha Postu Uatulari ne’ebé hetan orsamentu subvensaun públika husi Governu hamutuk rihun $20, maibé agora pasiva hela. Sira-ne’ebé hetan subvensaun mak atividade la la’o ne’e kompeténsia husi Komisaun Antí Korupsaun (KAK) atu haree,” nia relata.
Notísia relevante: SEKoop rejista ona kooperativa hamutuk 248 ho kapitál millaun $20,6
Tuir nia katak kooperativa hamutuk 16 nia atividade tranzasaun la’o di’ak, maibé SEKoop Munisípiu Vikeke kontinua akompaña sira no oferese formasaun espesialidade ba kooperativa hirak-ne’e nune’e labele pasiva, no mós kooperativa ualu (8) ne’ebé seidauk rejista iha notariadu ne’e SEKoop sei akompaña ba prosesu rejistu.
Tuir dadus komunidade ne’ebé envolve aan iha sai membru kooperativa iha Vikeke mak hanesan funsionáriu hamutuk na’in-361, agrikultór na’in-1.294, estudanate na’in-314, menus idade (sira-ne’ebé tinan 17 mai kraik) hamutuk na’in-130 no veteranu na’in-184.
Jornalista: Vitorino Lopez da Costa
Editór: Xisto Freitas da Piedade
