SEKoop rejista ona kooperativa hamutuk 248 ho kapitál millaun $20,6

DILI, 19 Agostu 2025 (TATOLI)–Sekretaria Estadu Kooperativa (SEKoop) daudaun ne’e rejista ona kooperativa primária hamutuk 248, ho membru 39.000 no kapitál akumuladu ho totál millaun $20,6.
Diretór Jerál SEKoop, Olderico Lopes, hateten, estabelesimentu kooperativa sira ne’ebé daudaun iha ba Federasaun Kooperativa munisípiu 11 iha hotu ona, falta munisípiu Baukau no Bobonaru mak seidauk. Prevee ona katak sei konklui maibé la estabelese iha trimestre ida-ne’e tuir Planu Asaun Anuál (PAA) 2025.
“Ami nafatin prontu ba grupu saida de’it mak hakarak harii kooperativa mai rejistu mak ami fasilita apoiu fó formasaun no pose, tanba harii kooperativa ne’e bele husi instituisaun maibé nia regra ne’e nafatin tuir regulamentu ne’ebé hatur ona iha SEKoop,” Diretór Jerál, Olderico Lopes, hato’o ba Ajénsia TATOLI, iha ninia knaar fatin, Tersa ne’e.
Notísia relevante : Kooperativa no grupu hamutuk hitu asesu ba orsamentu subvensaun públika husi SEKOOP
Nia esplika, SEKoop iha mandatu IX Governu, nu’udar instituisaun Governu ida ne’ebé mak multi-setorál, tutela ba Ministériu Koordenadór ba Asuntu Ekonómiku (MKAE) ho ninia papél importante mak atu fó apoiu ba dezenvolvimentu ekonomia família no komunidade nian liuhusi estabelesimentu, fasilitasaun ba kooperativa, halo promosaun merkadu no akompaña movimentu kooperativa, inklui empreza sira mikro, ki’ik no médiu iha Timor-Leste.
Diretór Jerál dehan tan, SEKoop seidauk simu proposta ruma husi Ministériu Asuntu Kombatente Libertasaun Nasionál (MAKLN) kona-ba atu harii kooperativa.
“Ha’u hanoin durante ne’e ami seidauk simu informasaun husi MAKLN kona-ba sira atu harii kooperativa tanba baibain tuir regulamentu ne’e hatama uluk proposta hafoin SEKoop rejista halo planu foin ba fó formasaun hotu fó pose,” nia akresenta.
SEKoop nafatin prontu bainhira de’it ba entidade ruma hakarak atu harii kooperativa, SEKoop prontu nafatin apoiu.
“Ami mós fó apoiu fundu transferénsia ba Grupu Veteranu Munisípiu Likisá hamutuk $18.000, ne’ebé sira halo atividade kona-ba hakiak animál no ortikultura,” nia tenik.
Jornalista : Arminda Fonseca
Editora : Julia Chatarina

