DILI, 22 Agostu 2025 (TATOLI)–Unidade Misaun Kombate Stunting (UNMICS) husu adisionál $346.188 iha ámbitu reuniaun Komité Revizaun Orsamentu (KRO) 2026 hodi fortalese serbisu.
Diretór Ezekutivu UNMICS, Joel Maria Pereira, informa, antes ne’e Ministériu Finansa atribui tetu fiskál $107.557 ba tinan 2026, fahe ba saláriu no vensimentu $69.562, bens no servisu $37.995, kapitál menór laiha no transferénsia públika laiha.
“Haree husi orsamentu ne’e, bainhira ita koloka ba planu prioridade sira la to’o, entaun iha reuniaun KRO ami husu fali adisionál $346.188 hodi implementa planu no programa sira ne’ebé ita tau ona iha planu,” Diretór Ezekutivu hato’o ba Ajénsia TATOLI, iha ninia knaar fatin, Farol, Sesta ne’e.
Osan adisionál ne’ebé unidade ne’e propoin, atu foku ba prioridade sira hanesan bazeia ba Diploma Ministeriál númeru 1/2025 15 Janeiru, hanesan organizasaun interna UNMICS atu selu saláriu ba kargu Adjuntu Diretór no Xefe Departamentu Programasaun ne’ebe unidadene’e presiza atu rekruta iha tinan 2026.
Aleinde ne’e, atu mantein no fortalese forsa traballu na’in-17, inklui Diretór Ezekutivu na’in-ida, Asesór Nasionál Administrativu no Jurídiku na’in-ida, Ofisiál no apoiu tékniku sira na’in-15 hodi destaka iha Departamentu haat hanesan Departamentu Programasaun, Departamentu Administrasaun, no Lojístika, Departamentu Finansa, no Departamentu Aprovizionamentu.
Notísia relevante : Governu ho UNICEF lansa Planu Asaun Nasionál Kombate Stunting
Iha tinan fiskál 2026, UNMICS mós propoin sei rekruta motorista ida no apoiu tékniku na’in-haat hodi sai nu’udar operadór ba sistema informátika iha implementasaun sosializasaun Planu Asaun Nasionál Kombate Stunting (PANKOS) nian.
Alokasaun iha bens no servisu, sei utiliza ba apoiuimplementasaun sosializasaun PANKOS inklui ninia sosializasaun ba nível munisípiu.
Proposta ne’e mós atu kobre partisipasaun Timor-Leste nu’udar pontu fokál SUN iha Rwanda no UN Food System Stoctake (UNFSS) ba tinan 2026, no atu asegura implementasaun no manutensaun ba sistema dashboard no repozitóriu ba ferramenta monitorizasaun no avaliasaun ba PANKOS nian.
“Ita mós iha planu formasaun no treinamentu ligadu ba PANKOS, nomós prevensaun no mitigasaun stunting,” nia akresenta.
Ba transferénsia públika nian husu adisionál tanba atu apoiu fundasaun, asosiasaun ka grupu komunitária la lukrativu hodi implementa programa nutrisaun integradu liuhusi projetu feeding integradu fó han nutritivu ba inan isin rua, inan fó susu no labarik tinan 5 mai kraik iha tinan 2026 sei aumenta tan área alvu haat ba programa referidu.
“Iha kapitál menór, ita mós husu adisionál tanba nesesidade atu kompra karreta operasionál rua, ekipamentu informátika ho kamera dijitál set ida hodi apoiu ba programa feeding, sosializasaun PANKOS no sistema dashboard tanba atualmente ekipamentu ne’e seidauk iha hodi fasilita no apoiu ba implementasaun programa. Item sira ne’e nesesita urjentemente tanba atualmente seidauk iha hodi fasilita no apoiu ba implementasaun atividade UNMICS,” nia kaatak.
Enkuantu, UNMICS nia ezekusaun orsamentu 2025 daudaun ne’e atinje ona 57,84% husi totál alokasaun $288.680.
Jornalista : Armada Fonseca
Editora : Julia Chatarina
