BOBONARU, 25 Agostu 2025 (TATOLI)—Sarani Dioseze Maliana hamutuk ho Autoridade Munisipál Bobonaru, Segunda ne’e, simu prezensa Krús Joven Internasionál ho serimónia kulturál hanesan dansa tradisionál, baku-likurai no poezia ne’ebé nu’udár tradisaun Timor-Leste nian hodi fó benvindu ba Krús Santu ne’e.
Hafoin serimónia simu Krús, Vigáriu Jerál Dioseze Maliana, Lucio Norberto de Deus hamutuk ho klero, relijiozu, sarani no ekipa Sinodal hala’o prosesaun husi Ponte Nunura ba to’o Igreja Pro-Katedrál Maliana.
Notísia relevante: Simu Krús Joven Internasionál, PNTL Bobonaru ho F-FDTL sei asegura movimentu sarani
Sarani sira hamulak no hananu tuir dalan durante prosesaun. Iha lurón sira-ne’ebe Krús liu, sarani sira nahe tais, hakne’ak halo oração no hananu nu’udár espresaun ksolok simu Krús Santu iha Timor espesialmente iha Dioseze Maliana.
Krús Joven Internasionál to’o iha Maliana iha tuku 15:00 resin. Hafoin ne’e, iha tuku 17:00 Otl, kontinua kedas misa ne’ebé prezide direta hosi Bispu Dioseze Maliana, Dom Norberto do Amaral.
Jornalista: Sergio da Cruz
Editór: Xisto Freitas da Piedade
