BOBONARU, 25 Agostu 2025 (TATOLI)—Polísia Nasionál Timor-Leste (PNTL) Munisípiu Bobonaru servisu hamutuk ho Unidade Patrullamentu Fronteira (UPF), Batallaun Orden Públika (BOP) no FALINTIL-Forsa Defeza Timor-Leste (F-FDTL) destakadu Postu Tunubibi sei asegura movimentu sarani sira hahú husi entrada Ponte Loes to’o Igreja Pro-Karedrál Maliana ho Parókia Bobonaru to’o ramata.
Segundu Komandante Polísia Munisípiu Bobonaru, Asistente Superintendente José Casemiro de Carvalho informa planu seguransa ne’e bazeia ba orden husi Komandu Jerál PNTL no F-FDTL hodi garante pás no estabilidade iha eventu internasionál ne’e.
“Ita servisu hamutuk oinsá atu asegura prezensa Krús Joven Internasionál iha ita-nia Munisípiu Bobonaru. Ami sei koloka membru sira hotu atu asegura Krús ne’e komesa kedas entrada rai-ketan entre Munisípiu Likisá ho Munisípiu Bobonaru lori to’o mai Pro-Katedrál depoiz ita sei kontinua ba Postu Administrativu Bobonaru,” nia informa ba jornalista sira iha nia kna’ar fatin, foin lalais ne’e.
Notísia relevante: Kardeál konsidera Krús joven hanesan sinál esperansa-unidade ba joven sira
Asistente Superintendente Polísia ne’e husu ba sarani liuliu joven sira atu hatudu maturidade no disiplina hanesan hatudu tiha ona iha eventu vizita Sua Santidade Papa Francisco iha tinan kotuk no eventu nasionál sira seluk, nune’e bele hametin nafatin pás no domin, tanba vizita Krús Joven Internasionál ne’e nu’udár oportunidade espesiál no istória boot ida ba Munisípiu Bobonaru.
“Karik iha ona perturbasaun ruma PNTL iha kompeténsia ruma atu halo prevensaun, halo atendimentu no foti asaun ne’ebé rigorozu ba grupu balun ne’ebé iha hanoin balun atu halo perturbasaun iha prezensa Krús Joven Internasionál mai ita-nia munisípiu,” nia dehan.
Tuir observasaun jornalista TATOLI iha Segunda ne’e nota katak PNTL ho F-FDTL koloka ona membru hamriik iha dalan-ninin hahú husi Ponte Loes to’o Igreja Pro-Katedrál Maliana hodi simu prezensa Krús Joven Internasional ne’ebé tuir ajenda sei to’o tuku 03:00 loraik ne’e.
Jornalista: Sergio da Cruz
Editór: Xisto Freitas da Piedade
