DILI, 25 Agostu 2025 (TATOLI) – Komisaun A iha Parlamentu Nasionál ba Asuntu Justisa no Konstitusionál konsidera katak Timor-Leste presiza iha Lei Seguransa Sibernétika, tanba lei ne’e importante tebes ba prosesu transformasaun dijitál no seguransa iha setór dijitál nian.
“La’ós Komisaun nia haree de’it, maibé Estadu presiza fó solusaun ba situasaun sira ne’ebé ita iha [ba] nesesidade nasaun nian”, Prezidente Komisaun A, Patrocínio dos Reis Fernandes, dehan iha Parlamentu, ohin.
Nia dehan Komisaun iha semana hirak liubá halo ona estudu komparativu iha Portugál hodi hasoru entidade lubun hodi buka esperiénsia, koñesimentu, abilidade relasiona ho hamosu Lei Seguransa Sibernétika ne’ebé liga liu ba asuntu tékniku.
“Sai referénsia ba deputadu sira, karik Governu aprezenta lei ruma kona-ba seguransa sibernétika”, nia salienta.
Deputadu membru Komisaun A, António Verdial de Sousa, mós reforsa katak presiza kria kondisaun ba iha implementasaun lei ne’e.
Lembra katak Ministériu Justisa (MJ), daudaun ne’e, envolve instituisaun oioin no apoia husi parseiru dezenvolvimentu internasionál sira hanesan Governu Austrália, Uniaun Europeia (UE), inklui organizasaun internasionál hanesan Nasaun Unida (ONU), Programa Nasaun Unida ba Dezenvolvimentu (PNUD) no Organizasaun Internasionál ba Migrasaun (IOM), hodi haree, análize no agora iha hela faze revizaun téknika ba Lei Seguransa Sibernétika.
Ministru Justisa, Sérgio Hornai, informa antes katak dokumentu legál ne’e rasik simu ona ideia husi Gabinete Prokuradór Jerál, ne’ebé halo hela análize no halo integrasaun husi ekipa téknika sira-ne’ebé iha kompeténsia hodi prepara versaun ikus husi lei referida.
Notísia relevante: MJ: Lei sibernétika iha hela faze revizaun
Jornalista: Nelson de Sousa
Editora: Maria Auxiliadora
