Liga Primeira Divizaun termina, Ponta Leste-Academica degrada ba Segunda Divizaun
DILI, 25 Agostu 2025 (TATOLI)–Jornada Liga Futeból Timor-Leste époka 2025 ba Primeira Divizaun ne’ebé termina iha domingu (24 Agostu 2025) ne’e, lori sorte-aat ba klube jigante rua hanesan AS Ponta Leste no Academica FC tenke degrada ba Segunda Divizaun tanba pontu tun liu kompara ho klube seluk.
Notísia Relevante: Karketu selebra hikas títulu kampiaun, Coração haksoit-sai husi zona mean
Klube Primeira Divizaun kompostu husi ekipa 10 mak hanesan Karketu Dili FC, Emmanuel FC, Porto Taibessi FC, Assalam FC, AS Marca, AD SLB Laulara, Coração FC, DIT FC, AS Ponta Leste no Academica FC.
Liga époka 2025 hala’o ho karáter meia-kompetisaun, tanba ne’e ekipa 10 ne’e tenke hala’o de’it jogu da-sia (9) durante fulan rua resin. Husi kompetisaun ne’e klube ualu (8) seluk halo esforsu ne’ebé másimu hodi gaña pontu ne’ebé barak salva-an husi zona-mean ka zona degradasaun, maibé Ponta Leste ho Academica nia pontu uitoan liu, nune’e labele mantein iha Primeira Divizaun.
Iha liga ne’e, Karketu Dili mak rekolla pontu barak liu hamutuk 20 durante jogu da-sia (9), ho nune’e klube kapitál Dili ne’e mak sai hanesan manán-na’in ba liga referidu.
Enkuantu klube seluk hanesan Emmanuel rekolla de’it pontu 17, Porto Taibessi rekolla pontu 12, Assalam rekolla pontu 11, DIT, Coração no Marca rekolla pontu ne’ebé hanesan mak pontu 10 maibé diferensa iha sofre golu, nune’e halo ekipa hirak ne’e nia pozisaun tuur lahanesan iha tabela klasifikasaun.
Ho nune’e, AD SLB rekolla pontu hamutuk sia (9) hanesan ho Academica no Ponta Leste maibé haree ba regulamentu head to head ne’e, SLB konsege manán Academica, Academica manán Ponta Leste, ho nune’e klube rua hanesan Academica no Ponta Leste mak tun ba Segunda Divizaun no SLB mantein iha Primeira Divizaun.
Tanba ne’e, agora daudaun, klube iha Primeira Divizaun hela de’it ualu (8) hodi hein jogu Segunda Divizaun nian ne’ebé seidauk termina. Bainhira termina klube rua iha Segunda Divizaun ne’ebé rekolla pontu barak liu mak sei sa’e ba okupa pozisaun rua ne’ebé mamuk ona no Ponta Leste ho Academica tenke tun ba prienxe fali fatin mamuk ne’ebé klube Segunda Divizaun rua sei husik.
Nune’e, iha klube Segunda Divizaun mós rua sei degrada ba Terseira Divizaun bainhira rekolla pontu uitoan-liu no tuir planu orgaun liga tinan ne’e sei halo mós jogu ba terseira divizaun hodi buka klube tolu (3) hodi bele prienxe iha Segunda Divizaun.
Klube ne’ebé daudaun ne’e iha Segunda Divizaun mak hanesan Aitana FC, Santa Cruz FC, Nagardjo FC, FIEL FC, Lica-Lica Lemorai FC, Zebra FC no Kablaki FC.
Iha tabela klasifikasaun provizóriu ne’ebé iha ba Segunda Divizaun, Aitana rekolla ona pontu 12, Santa Cruz rekolla pontus 11 no klube rua ne’e kandidatu forte promove ba Primeira Divizaun maibé seidauk hatene tanba sei iha jogu ikus.
Enkuantu, klube seluk hanesan, Nagardjo rekolla pontu sia (9), FIEL rekolla pontu ualu (8), Lica-Lica rekolla pontu neen (6), Zebra rekolla pontu lima (5) no Kablaki sei hela ho pontu zero ka seidauk manán no empata dala ida durante jornada da-lima (5).
Notísia Relevante: Karketu Dili FC garantidu Kampiaun LFTL 2025
Jornalista : Hortencio Sanchez
Editór : Cancio Ximenes
