Vidal Lopes rekoñese kadeira roda iha HNGV limitadu
DILI, 25 Agostu 2025 (TATOLI)—Diretór Servisu Apoiu Diagnostiku no Terapéutiku Iha HNGV, Vidal de Jesus Lopes, rekoñese katak kadeira roda iha Hospitál Nasionál Guido Valadares limitadu, nune’e iha sala balun kadeira roda iha no sala balun laiha.
“Durante ne’e, iha HNGV kadeira roda la to’o ba pasiente sira, tanba kadeira iha de’it 40 resin, nune’e Hospitál fó de’it ba pasiente sira-ne’ebé kondisaun ladun di’ak no ba sira-ne’ebé kondisaun di’ak uitoan sira labele uza kadeira roda ne’e no husu familia sira-nia ajuda para bele akompaña,” Vidal de Jesus Lopes hateten ba jornalista sira iha nia kna’ar fatin Bidau, ohin.
Nia esplika, HNGV rekoñese ba preokupasaun pasiente sira-nian no durante ne’e kadeira roda limitadu, tanba balun la di’ak ona, nune’e sira tenke hadi’a fila fali.
“Ami rekoñese númeru entermu ne’e kadeira roda iha Hospitál Nasionál bazeia ba dadus ne’ebé iha porvolta 40-resin de’it tanba balun avaria, roda-kuak no balun prafuzu aat. Entermu de’it, nia númeru seidauk bele satisfás tuir nesesidade. Maibé ida-ne’ebé presiza hanesan tohar sira-ne’e, bele uza no ne’ebé la’o la di’ak ne’e presiza duni ba sira, maibé ida-ne’ebé familia ajuda, bele husu família nia kompreensaun, atu nune’e familia bele fasilita,” nia hateten.
Nia esplika, dadauk ne’e HNGV esforsu atu kompra tan kadeira roda bazeia ba rasiu ne’ebé iha HNGV.
“Ami esforsu hela atu kompra tan, maibé atualmente ami rekoñese katak numeru ne’e presiza duni atu aumenta tan, entermu kadeira roda. Ami kompra bazeia ba rasiu ne’ebé mak ita iha tanba ita sosa mós presiza atu uza, balun doadórs sira fó ita uza entaun rasiu ne’ebé iha se 40-resin ita sosa tan kadeira roda 15 ida hanesan ne’e, depende ba nesesidade ita-nian,” nia dehan.
Jornalista : Felicidade Ximenes
Editór : Cancio Ximenes
