Empreza rua entrega ona ró peska unidade 140 ba MAPPF
DILI, 26 Agostu 2025 (TATOLI) – Empreza Seramor no Auto Zone entrega ona ba Ministériu Agrikultura, Pekuária, Peska, no Floresta (MAPPF) ró peska unidade 140.
Diretór-Jerál Peska MAPPF, Acácio Guterres, informa katak ró sira ne’e empreza sira halo akizisaun iha tinan 2024 no entrega ba ministériu entre Maiu no Agostu tinan ne’e.
“Ró agora iha hotu ona armazein ministériu nian, maibé atu distribui ne’e hein tékniku sira halo verifikasaun ba peskadór sira, haree ida ne’ebé iha direitu liu atu simu, tanba pedidu husi peskadór sira mai ne’e liu rihun ida, enkuantu ró iha de’it 140”, dirijente ne’e informa iha Komoro, ohin.
Lembra katak MAPPF aloka verba iha 2024 hodi kontrata empreza responsavél hodi halo akizisaun. Auto Zone fornese unidade 100 ne’ebé ekipada ho motór elétriku, ho totál ró 146, enkuantu Seramor entrega unidade 40 ho nia motór 40.
Orsamentu ba akizisiasaun ró 140 husi Auto Zone sosa ró 140 hamutuk $744.080 no Seramor hamutuk rihun $216.
Lembra katak, iha 2022, ministériu mós sosa ona ró 110 ne’ebé, fahe ona ba peskadór sira, liuliu iha zona kosteira súl nasaun nian, hanesan iha Manatutu-Natarbora, Kovalima-Suai no Bobonaru-Atabae. Distribuisaun ró ne’e kontinua iha tinan ne’e.
Notísia relevante: Empreza Seramor sei entrega ró peska unidade 40 ba MAPPF
Jornalista: Arminda Fonseca
Editora: Maria Auxiliadora
