DILI, 27 Agostu 2025 (TATOLI)—Governu liuhusi reuniaun Konsellu Ministru, kuarta ne’e, aprova projetu Rezolusaun Governu nian ba estratejia lina ministeriál sira atu kria Komisaun Diretiva hodi elabora Roteru Nasionál ba Dezenvolvimentu Merkadu Abitasaun nian.
Rezolusaun ne’e aprezenta hosi Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Sabino Assanami , no Ministru Planeamentu no Investimentu Estratéjiku, Gastão Francisco de Sousa.
“Rezolusaun Governu ida-ne’e prevee atu harii Komité Diretiva ida-ne’ebé kompostu husi membru Governu balun no hetan apoiu husi Grupu Traballu Tékniku ida, ne’ebé ninia misaun mak atu prepara, halo revizaun no finaliza Roteiru. Dokumentu ida-ne’e sei define estratéjia no mekanizmu sira atu implementa, monitoriza no avalia polítika sira-ne’ebé ho objetivu atu hadi’a kondisaun moris iha rai-laran,” refere nota ne’ebé Agência Tatoli asesu, ohin.
Medida ne’e buka atu hatán ba ezijénsia abitasaun nian ne’ebé aumenta no nesesidade atu garante abitasaun dignu no adekuadu ba sidadaun sira, hanesan prevee iha Konstituisaun no Programa Governu Konstitusionál da-sia (IX) nian.
Objetivu mak atu kria kuadru ida-ne’ebé koordenadu no sustentável ba dezenvolvimentu merkadu abitasaun, ho envolvimentu husi instituisaun públika sira, setór privadu no parseiru dezenvolvimentu sira, ho hanoin atu garante solusaun ne’ebé efetivu no asesivél liu ba populasaun.
Antes ne’e, iha 06 Marsu, Governu Timor-Leste liuhusi Ministru Planeamentu Investimentu no Estratéjiku (MPIE), Banku Sentrál Timor-Leste (BCTL) no Internationál Finance Corporation (IFC) lansa Forum dezenvolvimentu merkadu abitasaun iha asaun auditoriu Kay Rala Xanana Gusmão.
Vise Primeiru-Ministru, Ministru Koordenadór Asuntu Ekonómiku no Ministru Turizmu Ambiente, Francisco Kalbuadi Lay, ne’ebe reprezenta Primeiru-Ministru Kay Rala Xanana Gusmão, apelu importante atu envolve sosiedade nu’udar setór dezenvolvimentu inklui setór umanitária.
“Governu iha kompromisu hodi harii setór umanitária ne’ebé bazeia ba planu sei iha ninia estrutura no mós sistema administrasaun ne’ebé bele garante finansamentu ho efisiénsia,” nia dehan.
Iha forum ne’e rasik, Ministru Planeamentu Investimentu no Estratéjiku, Gastão Francisco de Sousa, hateten sorumutu ida-ne’e konsentra setór públiku no privadu sira hodi ko’alia kona-ba oportunidade ba harii umanitária ne’ebé seguru no kualidade.
IFC lansa relatóriu ho tema “Harii futuru: Promove finansiamentu Umanitária iha Timor-Leste”, ne’ebé reprezentante IFC, David Freedman, informa katak asesu ba iha umanitária ne’ebé kualidade nu’udar direitu umanu nian, nune’e mós mudansa prinsipál ba dezenvolvimentu sosiál no ekonómia.
Jornalista : Alexandra da Costa
Editór : Cancio Ximenes
