2020-2025, SERVE Bobonaru arrekada reseita $64.993,75 ba kofre Estadu
BOBONARU, 28 Agostu 2025 (TATOLI)—Hahú husi tinan 2020 to’o Jullu 2025, Servisu Rejistu Verifikasaun Emprezariál, Institutu Públiku (SERVE, I.P.) Delegasaun Territoriál Munisípiu Bobonaru halibur reseita hamutuk $64.993.75 hodi kontribui ba kofre Estadu.
Reseita ne’ebé rekollida iha tinan 2020 hamutuk $1.001, 2021 $765.50, 2022 $14.052, 2023 $14.459,15, 2024 $22.720 no meiadu 2025 $12.002.
“Ha’u hanoin kuandu períodu tuirmai mak ita-nia munisípiu hamriik ona hanesan Kámara Munisipál ita bele rekolla reseita liután husi atividade komersiál sira,” Koordenadór SERVE Munisípiu Bobonaru, Leopoldo Pereira Fernandes hateten iha atividade divulga informasaun kona-ba kna’ar no kompetensía AIFAESA, I.P. ne’ebé realiza iha Salaun Maria-Tapó, Bobonaru, Kinta ne’e.
Notísia relevante: SERVE Bobonaru halibur reseita $4.864 iha trimestre daruak 2025
Leopoldo esplika katak reseita hirak-ne’e halibur liuhusi atividade kliente sira mai halo renovasaun dokumentu sira hanesan sertidaun rejistu komersiál, re-imprime sertidaun rejistu komersiál, pedidu rejistrasaun foun no renovasaun ba ezersísiu atividade ekonómika ne’ebé sujeita atu hetan lisensa setoriál selu taxa $60 kada atividade tuir Dekretu-lei númeru: 83/22, 23 Novembru.
Aleinde ne’e, rekolla mós husi empreza sira ne’ebé mai halo alterasaun objetu, aumenta atividade, alterasaun sede, administradór, órgaun sosiál, kapitál sosiál no seluk tan.
Enkuantu, hahu husi 2013 to’o 2025 ne’e SERVE, I.P. Munisípiu Bobonaru rejistu atividade komersiál hamutuk 2.723.
Jornalista: Sergio da Cruz
Editór: Xisto Freitas da Piedade
