DILI, 28 Agostu 2025 (TATOLI) – Iha 30 Agostu 2025 ne’e, Timor-Leste komemora Loron Konsulta Populár ba da-26 no iha selebrasaun data deputadu CNRT, Natalino dos Santos, konsidera katak loron ne’e nu’udar momentu afirmasaun timoroan sira atu hetan direitu autodeterminasaun.
Tanba ne’e, iha komemorasaun loron referidu nia husu ba jerasaun foun atu halo reflesaun hodi hatene importánsia husi data ida-ne’e, tanba antes to’o iha ne’ebá timoroan sira hasoru sofrimentu oioin.
“Reasaun sentimentu iha momentu ne’ebá povu ida-ne’e patriota no erói duni. Liuhusi situasaun ho violénsia oioin, maibé entuziasmu ho determinasaun makas’a tebes”, nia relembra.
Tuir nia, Konsulta Populár sai pontu kulminante ba luta hasoru invazaun ilegál durante tinan 24 no povu maioria hakarak hili independénsia.
Iha sorin seluk, deputada PLP, Maria Angelina Sarmento Lopes, dehan povu nia esperansa boot iha momentu Konsulta Populár hodi Timor-Leste sai nasaun ida independente. Tanba ne’e, komemorasaun data ne’e nu’udar momentu reflesaun ba ukun-na’in sira hodi lori dezenvolvimentu no moris di’ak ba povu.
Tuir nia, maski ukun-an ona maibé povu sei moris ki’ak no seidauk sente dezenvolvimentu hanesan estrada, bee-moos, saúde, eletrisidade no seluk tan. Nune’e nia husu ba sidadaun hotu atu partisipa iha prosesu dezenvolvimentu país no kontribui ba pás.
Deputadu KHUNTO, António Verdial de Sousa, mós solisita ba líder polítiku sira atu iha unidade hodi dezenvolve país ne’e no presiza iha kontinuidade governasaun ba programa importante sira.
Armando Lopes, deputadu PD mós konsidera determinasaun ba ukun-an iha Konsulta Populár ne’e ema hotu-hotu iha unidade, iha asaun ida mak hakarak ukun-an.
Notísia relevante: Lere: Konsulta Populár hanesan oportunidade únika ba povu deside futuru nasaun
Jornalista: Nelson de Sousa
Editora: Maria Auxiliadora
