CI rejista mídia nasionál hitu komete infrasaun étika hamutuk 18

DILI, 29 Agostu 2025 (TATOLI)—Konsellu Imprensa (CI, sigla portugés) rejista mídia nasionál hitu (7) ne’ebé komete infrasaun étika hamutuk 18.

Diretór Análiza Mídia no Dezenvolvimentu Mídia Konsellu Imprensa, Alberico da Costa Junior, hateten kuaze mídia sira-ne’ebé komete infrasaun étika ne’e kompostu husi mídia online, eletrónika no mídia imprime hanesan Rádiu Televizaun Timor-Leste, Empreza Públika (RTTL, E.P), Agência Notisioza Tatoli (TATOLI, I.P), Grupu Média Nasionál (GMN-TV), Media Mudansa, Jornál Suara Timor Lorosa’e (STL), Tve-Timor inklui Timor Post, ne’ebé rejistadu iha CI.

“Husi rezultadu análizasaun ba infrasaun ne’e bazeia (5W + 1H) no kódigu étika jornalizmu nian hatudu katak GMNTV mak domina liu ho pontu hitu (7), RTTL, E.P ho pontu lima (5), Agência Notisioza Tatoli ho pontu rua 92), Media Mudansa ida (1), STL ida (1), Timor Post ida (1) no TTVE-Timor mós ida (1), nune’e fiar katak ho rezultadu ne’e bele fó hanoin ba mídia sira hodi hadi’a di’ak liután,” Nia hateten iha enkontru Forum Editoriál ne’ebé realiza iha edifísiu CI, iha Kintal Boot, ohin.

Tuir rezulatdu monitorizasaun haktuir katak, infrasaun étika ne’ebé Grupu Média Nasionál (GMN-TV) komete hamutuk hitu (7) mak ho títulu notísia hanesan:

1. Sosiedade Sivíl alega katak Ministru Administrasaun Estatál Tomas Cabral prátika familiarizmu
2. Embaixadora EUA iha Timor-Leste deside rezigna-an
3. Diretór eskola ensinu sekundáriu privadu Nicolau Lobato alegadamente halo asédiu seksuál
4. Asédiu seksuál bele akontese ba ema hotu no iha fatin ne’ebé de’it
5. José Gonçalves hanesan funsionáriu permanente Destaka iha karantina iha Aero-Porto Internasionál Nicolau Lobato Dili, lamenta ho desizaun atuál Diretór Karantina
6. Funsionáriu Kuarantena Ministériu Agrikultura sei keixa sira-nia diretór ba Ministériu Públiku no KAK”
7. SEII husu PNTL identifika suspeitu ba kazu soe bebé iha Munisípiu Likisa

Infrasaun étika ne’ebé Rádiu Televizaun Timor-Leste (RTTL, E.P) hamutuk lima (5) mak ho títulu notísia hanesan;

1. HNGV rekoñese, númeru pasiente mate durante periódu 2024, liu ona padraun husi OMS
2. Ministériu Defeza sosa tan kilat metralladór ho pistola ba Komandu F-FDTL
3. Deskonfia Diretór ESG ida iha Dili Oeste prátika asédiu seksuál
4. Ministériu Públiku alega pena multa ba arguidu AODN, deskonfia komete krime ofensa hasoru lezada Dionizia Ximenes da Silva hanesan rekluzu
5. Polísia ke’e sai mate-isin bebé mane ida iha área Kampung Baru Aldeia Ai-Lora suku foho Ai-Liko.

Agênsia Notisioza Tatoli mós komete infrasaun étika hamutuk rua (2) mak hanesan;

1. Matan Ruak husu povu atu respeita Governu nia atuasaun ba despezu administrativa
2. PM la aseita ho Relatóriu Kámara Konta ba Auditíria 2015

Timor Post komete infrasaun étika hamutuk ida (1) mak hanesan;

1. PN lamentavel ho atetude Prezidente BNCTL lori osan Estadu ba pasear

Suara Timor Lorosa’e (STL) komete infrasaun étika hamutuk ida (1) mak hanesan;

1. Primeiru Ministru (PM) Kay Rala Xanana Gusmão la fiar justisa iha Timor, tanba halo buat la loos

TVE-Timor komete infrasaun étika hamutuk ida (1) mak hanesan;

1. Auto defeza personalidade kona-ba deskonfia halo asédiu seksuál

Media Mudansa komete infrasaun étika hamutuk ida (1) mak hanesan;

1. Mosu konfrontu iha Kailako, Ronaldinho lakon vida tanba tiru husi PNTL

Jornalista : Alexandra da Costa

Editór       : Cancio Ximenes