AILEU, 30 Agostu 2025 (TATOLI)–Governu liuhusi Ministru Defeza Kontra Almirante Donaciano Costa Gomes ‘Pedro Klamar Fuik’, Sábadu ne’e, ofisialmente halo ona lansamentu ba futuru instalasaun edifísiu akademia militár konjunta, ne’ebé lokaliza iha área Hundolte, Aldeia Bandeira Hun, Suku Liurai, Munisípiu Aileu.
Konstrusaun sei sai hanesan sentru formasaun exelente hodi fó formasaun ba militár no polísia, liuliu liga ba siénsia militár no polísia inklui ema sivíl hodi prepara futuru lideransa ne’ebé kualidade. Edifisiu ne’e tuir planu sei harii iha tinan ne’e nia laran no sei ramata iha Fevereiru tinan oin.
Diretór interinu Institutu Defeza Nasionál (IDN), Nuno Corvelo Sarmento, hateten, loron 30 Agostu ohin, IDN halo atividade tolu hanesan komemorasaun loron Referendu ba dala-XXVI, selebra ezisténsia Institutu Defeza Nasional ba dala-XV no hatuur fatuk dahuluk ba konstrusaun futuru edifísiu akademia militár konjunta iha Aileu.
“Futuru instalasaun edifísiu akademia militár konjunta ne’e sei konstrui ho osan millaun $3. Ita dezeja atu harii ida-ne’e para ita forma ita-nia lideres, kuadrus superior militár, polísiais sivíl para oinsá sira hatene trasa estratejia para depois lori ita-nia nasaun bá mehi ne’ebé ita hotu, ita-nia beiala sira uluk hahú funu sira-nia hakarak to’o iha jerasaun ne’ebé hatutan ne’e to’o alkansa objetivu di’ak, no fim lori povu ne’e ba moris di’ak no pás,” Nuno hateten ba jornalista sira hafoin serimónia iha Suku Liurai.
Notísia relevante : Ministru Defeza Sjafrie no Donaciano destaka kooperasaun militár no empodera forsa defeza
Akademia militár ne’e kompostu husi sala ne’ebé bele akumula estudante na’in-120, kompleta ho dormitóriu no fasilidade ne’ebé adekuadu no modernu.
Diretór interinu dehan, Ministériu Defeza sei loke konkursu, nune’e bainhira hetan ona empreza mak bele hahú ona konstrusaun.
Iha fatin hanesan, Xefe Estadu Maiór Forsa Armada (XEMF), Brigadeiru Jenerál José da Costa Soares ‘Trix, hateten, iha tinan 50 liubá rai Aileu loke dalan ba libertasaun povu Timor nian no ohin filafali mai rai Aileu hodi halo lansamentu ba konstrusaun akademia konjunta ba jerasaun foun ne’ebé enfrenta atividade diversa.
“Akademia konjunta ida-ne’e simboliza maturidade institusionál ne’ebé bele hamutuk fó koñesimentu disipliña no kompromisiu demokrátiku, liuliu ita-nia presisténsia, patriotizmu no nasionalizmu,” nia afirma.
Nune’e, nia lori Xefe Estadu Maiór Jenerál Forsa Armada FALINTIL- Forsa Defeza Timor-Leste (F-FDTL) nia naran, hakarak kongratula Governu liuhusi Ministru Defeza Kontra Almirante Pedro Klamar Fuik nia esforsu hodi harii akademia militár konjunta.
“Iha kestaun ida-ne’e,Sha’u tenke rekoñese ba esforsu sua Exelénsia Ministru Defeza tanba nia determinasaun firme atu moderniza ita-nia forsa sira no ba ita-nia vizaun ba defeza koesa no integradu,” Trix katak.
Nune’e mós, Reprezentante Prezidente Autoridade Munisípiu Aileu, Vitória Mesquita do Rego, kongratula IX Governu Konstitusionál ba inisiativa ne’e.
“Ami hakarak agradese ba Governu dala-ida tan bele hili Aileu hodi konstrui edifísiu akademia militár konjunta iha ne’e. Ami sei koopera hodi fó susesu ba obra ida-ne’e,” nia tenik.
Hafoin halo lansamentu fatuk dahuluk ba fatin Konstrusaun edifisiu akademia militár konjunta, Ministru Defeza akompaña husi entidade oioin kuda ai-oan hodi prevene fatin konstrusaun akademia labele iha erosaun.
Jornalista : Natalino Costa
Editora : Julia Chatarina
