Estudante universitária konsidera la nesesária sosa karreta ba deputadu sira
DILI, 01 Setembru 2025 (TATOLI)—Estudante Universidade Orientál Timor-Lorosa’e (UNITAL) diskorda ho polítika Parlamentu Nasionál (PN) atu sosa karreta ba deputadu sira.
Antes ne’e, PN aprova ona osan privativu ho montante milaun $4,2 hodi sosa karreta 65 ba deptuadu sira.
Portavós UNITAL, Jaime da Cruz Castelhano, konsidera polítika ne’e la nesesáriu no husu Parlamentu atu kansela verba sosa karreta, molok halo anúnsia ba konkursu públiku.
“Ami konsidera katak desizaun polítika sosa kareta luxu ka prado ne’e iróniku tebes, ida-ne’e bele konsidera hanesan alokasaun fundu ne’ebé la efisiente. Tanba fundu supostu bele aloka ba programa kombate ki’ak, mellora infraestrutura ka aumenta servisu públiku, maibé uza de’it ba ema balun nia interrese,” Portavós hato’o liuhusi konferénsia imprensa, iha resintu UNITAL, Bekora, Segunda ne’e.
Nia argumenta, desizasun ne’e hatudu momoos diferensa sosiál boot entre elite polítika no povu tanba kerreta luxu sai ona hanesan símbolu ba estatutu poder no agrava kondisaun ki’ak ne’ebé sidadaun barak hasoru.
Nune’e, estudante ne’e husu ba deputadu sira iha PN atu iha seriedade foti desizaun ba moris di’ak povu no nasaun no labele halo desizaun ne’ebé fó benefísiu de’it ba interrese grupu, partidu no família.
Notísia relevante : Proposta orsamentu privativu 2025 sei sosa karreta ba deputadu 65
Tuir Portavós, Governu no PN tenke iha kapasidade no responsabilidade morál hodi rezolve problema sira ne’ebé agora akontese hanesan aimoruk laiha no ema kontinua mate, kualidade edukasaun laiha, bee-moos laiha, estrada sira iha territóriu nasionál laiha kualidade no seluk tan.
Estudante ne’e nota mós katak, setór alternativu sira la funsiona no kontinua dependénsia ba fundu petrolíferu, maibé deputadu sira kontinua sosa karreta luxu sein halo fiskalizasaun efetiva ba programa ne’ebé Governu ezekuta.
“Ho problema hirak ne’e, ami husu ba Parlamentu Nasionál, liuliu komisaun relevante, presiza tetu didi’ak antes prevee orsamentu ba sosa karreta prado ba deputadu sira, tanba ita haree montante osan ho kustu ne’ebé
boot tebes bele aloka fali ba povu nia nesidade seluk, labele gasta de’it osan povu nian ba priviléjiu ema ka grupu,” nia katak.
Estudante sira haree, deputadu sira la’ós ona reprezenta povu, hodi ko’alia povu nia moris, maibé reprezenta de’it sira-nia partidu, família no grupu.
“Deputadu sira hetan priviléjiu boot tebes, la’ós de’it sosa karreta, maibé simu subsídiu oinoin no direitu regalia sira hanesan osan manutensaun, alojamentu, laptop, tratamentu saúde, osan pulsa no seluk tan,” Jaime da Cruz tenik.
Iha fatin hanesan, Portavós UNITAL, Cedelizio Kouchay Moniz, la aseita ho desizaun PN nian tanba nia konsidera dezenvolimentu iha setór xefe sira hakdasak hela.
“Sosa karreta ba deputadu, ami la aseita totál, tanba dezenvolvimentu hakdasak no hakneak rabat rai, liuliu problema edukasaun, saúde, agrikultura, ekonómia, presiza rezolve uluk problema hirak ne’e,” nia akresenta.
Estudante ne’e dehan, karik deputadu sira nafatin mantein desizaun sosa karreta mak tempu badak sira sei mobiliza no halo asaun hasoru PN.
Antes ne’e, Prezidente Parlamentu Nasionál (PPN), Maria Fernanda Lay, hateten, sosa karreta nu’udar dever no hanesan fasilidade tuir lei hateten.
“Tanba ne’e mak ha’u deside inisiativa halo proposta tau iha ne’eba. Se Deputadu sira hakarak okey no lakohi ne’e laiha buat ida, ami bele hasai. Sei sosa karreta fó ba Deputadu 65, afinál hotu-hotu hakarak. Simplismente, lakohi iha votasaun mak ita haree took,” nia akresenta.
PPN fundamenta, iha nesesidade atu sosa karreta foun tanba karreta sira-ne’ebé daudaun Deputadu sira uza barak mak kondisaun ladiak ona.
“Ita-boot sira la rona semana-semana Prezidente tenke haree manutensaun. Nune’e, ida karreta 35 ne’ebé hola ba sira-ne’ebé re-eleitu uza nafatin karreta lejislatura datoluk nian, ne’ebé agora tinan 12 ona. Tuir loloos, karreta ho kondisaun ne’ebé uza ba sa’e foho, ita hatene ita-nia infraestrutura ladi’ak, bainhira nia manutensaun boot liu mak ita-nia gastu boot-liu. Ho razaun ne’e, nu’udar Prezidente Parlamentu Nasionál propoin atu sosa foun iha tinan oin, maibé ne’e depende ba desizaun deputadu 65 nian,” nia katak.
Jornalista : Osória Marques
Editora : Julia Chatarina
