DILI, 01 Setembru 2025 (TATOLI)–Ministru Ensinu Superiór Siénsia no Kultura (MESSK), José Honório da Costa hateten, IX Governu Konstitusionál laiha polítika atu kontinua Sidade Universitária Aileu.
“Sidade universidade haluha tiha de’it, laiha ona. IX Governu la tau osan ba Sidade Universitária ne’e,” Ministru hato’o iha Ministériu Negósiu Estranjeiru no Kooperasaun (MNEK), Praia dos Coqueiros, Segunda ne’e.
Governante ne’e hatutan, Governu laiha planu atu kontinua Sidade Universitária Aileu, maibé sei investe maka’as iha Universidade Nasionál Timor-Lorosa’e (UNTL) nu’udar instituisaun ensinu superiór públiku hodi garante kualidade estudante sira-nian.
Notísia relevante : Governu sei lakontinua Sidade Universitária Aileu maibé investe fali ba UNTL
Desizaun IX Governu la kontinua dezenvolve projetu ne’e tanba konsidera la nesesária no ezekutivu iha hanoin atu investe liután iha universidade nasionál atu prepara di’ak liután kondisaun hodi lori progresu ba alunu sira.
“Ita hapara hodi la kontinua prosesu ba Sidade Universitária Aileu ne’e la’ós desizaun Ministru nian, maibé IX Governu tanba la nesesária,” nia katak.
Antes ne’e, iha governsaun anteriór prevee ona osan hamutuk millaun $2,1 ba indenizasaun no hasai ona $1.037.987 hodi selu uma-kain 44 ne’ebé lakon uma, abitante 58 ne’ebé lakon sira-nian ai-horis no 102 ne’ebé lakon ona rai.
Jornalista : Osória Marques
Editora : Julia Chatarina
