DILI, 01 Setembru 2025 (TATOLI) – Komisaun A iha Parlamentu Nasionál ba trata Asuntu Justisa no Konstituisionál sei fó prioridade hodi diskute Lei Orden Advogadu nian.
Prezidente Komisaun A, Patrocínio dos Reis Fernandes, dehan proposta-lei ne’e iha lejislatura dalimak halo ona diskusaun no to’o ona iha espesialidade, maibé kaduka tiha, tanba tama ona tempu kampaña eleitorál.
Nune’e, Komisaun tau ona iha ajenda atu inisia fali, tanba importante tebes. “Agora, presiza trata iha lejislatura daneen”, nia hateten iha Parlamentu, ohin.
Komisaun mós sei hein Governu, liuhusi Ministériu Justisa no Komisaun Reforma Setór Justisa bainhira aprezenta pakote lejislasaun sira maka sei trata hamutuk.
“To’o agora Komisaun seidauk simu pakote lei ba reforma justisa, simu mak proposta alterasaun hanesan ita-boot sira akompaña”, dehan.
Relembra katak iha lejislatura dalimak, tinan 2022, Komisaun A halo ona diskusaun ba Proposta-Lei númeru 26/V/3a kona-ba Orden Advogadu iha faze espesialidade to’o ona artigu 50-resin.
Lejislasaun ne’e atu halo regulasaun asesu no ezersísiu iha profisaun advogadu sira, inskrisaun no emisaun korrespondente sédula profisionál, ne’ebé prepara husi Ministéiru Justisa liuhusi Konsellu ba Jestaun no Disiplina iha Advokasia.
Proposta-lei ne’e komposta husi artigu hamutuk ualu, anexu ida, kapítulu sia, no kontein ho artigu hamutuk 101.
Notísia relevante: Komisaun A diskute ona artigu 51 proposta-lei orden ba advogadu sira
Jornalista: Nelson de Sousa
Editora: Maria Auxiliadora
