PNTL no MS sei intensifika asisténsia saúde ba membru Polísia moras stroke
DILI, 01 Setembru 2025 (TATOLI)—Departamentu Saúde Polísia Nasionál Timor-Leste (PNTL) no Ministériu Saúde (MS) sei intensifika liután servisu asisténsia saúde ba membru Polísia ne’ebé enfrenta moras stroke.
Xefe Departamentu Saúde PNTL, Superintendente Asistente Polísia Analita do Rego Fatima dehan, durante ne’e iha membru Polísia mós mate derrepente no ba membru Polísia ne’ebé moras baibain no moras barak, tanba ne’e ba oin nesesáriu duni atubele intensifika kooperasaun ho Ministeriu Saúde hodi fó tratamentu ba membru ne’ebé mak moras stroke.
“Haree ba númeru mortalidade interiormente to’o agora aumenta, tanba ne’e mak Departamentu Saúde Polísia Nasionál Timor-Leste esforsu-an atu serbisu hamutuk ho Ministeriu Saúde ho Ajénsia sira ne’ebé mak trata ba asuntu saúde atu halo prevensaun ba kolega sira komesa husi Ajente superiór,” Xefe Departamentu Saúde hato’o ba Jornalista sira, iha Kuartél Jerál PNTL, Kaikoli, Segunda ne’e.
Notísia relevante : Moras tensaun, diabetes no estroke mai husi hahán no bebida
Nia dehan, daudaun halo hela tratamentu ba membru sira ne’ebé ho moras stroke, ne’ebé serbisu hamutuk ho ospitál nasionál, liuliu Doutór Espesialista sira atubele fó tratamentu.
Xefe Departamentu Saúde seidauk bele relata dadus membru Polísia ne’ebé ho kondisaun moras stroke ladún grave no grave.
“Dadus ne’e iha, maibé ami labele mensiona tanba ne’e segredu, ami hatene duni moras, maibé ami esforsu serbisu hamutuk ho parte Ministeriu Saúde para haree ba ami-nia membru sira hotu,” nia katak.
Jornalista : Natalino Costa
Editora : Julia Chatarina
