Jurista konkorda halo revizaun ba Konstituisaun
DILI, 02 Setembru 2025 (TATOLI) – Jurista timoroan, Alexandre Corte-Real, konkorda ho hanoin husi deputadu Partidu Kongresu Nasionál Rekonstrusaun Timorense (CNRT) ni’an atu halo revizaun ba Konstituisaun Timor-Leste nian.
Tuir akadémiku husi Universidade Nasionál Timor Lorosa’e (UNTL), normalmente revizaun ne’e hala’o tinan neen, maibé agora liu tinan 20-resin seidauk halo, nune’e tempu ona hodi bele atualiza ho situasaun atuál.
Nia husu bankada parlamentár sira atu armoniza hanoin iha lian hanesan hodi bele hamosu ezbosu ida.
Tuir nia, métodu revizaun ne’e bele halo aditamentu, eliminasaun no balun dezenvolve tan interpretasaun.
“Konstituisaun iha artigu balun la relevante ona, pur ezemplu krime grave, la presiza tau ona iha ne’ebá, depois iha interpretasaun iha artigu balun halo konfuzaun”, nia informa ba Tatoli iha Palásiu Prezidensiál, Bairru Pité.
Nia prefere atu halo revizaun kona-ba artigu ne’ebé ko’alia kona-ba maioria parlamentár. Ezemplu mak bainhira partidu ida manán eleisaun, la’ós direta ukun, maibé presiza iha maioria parlamentár.
“Se nia manán ho kadeira 30 no 33, ne’e automátika nia ukun, más la to’o nia tenke halo koligasaun, nune’e tenke esplika klaru maioria simples no absoluta”, nia sujere.
Aleinde ne’e, Tribunál Rekursu no Supremu Tribunál Justisa ne’e tenke fahe, nune’e labele iha interpretasaun oioin.
Matéria seluk sai ezemplu mak hanesan Prezidente Repúblika la fó pose ba membru Governu.
Notísia relevante: Revizaun ba Konstituisaun hanesan asuntu Estadu nian
Jornalista: Nelson de Sousa
Editora: Maria Auxiliadora
